Ruoŧa Sámedikki stivra dohkkehii disdaga Suoma Sámedikki evttohusa ráđđádallagoahtit aktasaš sápmelašmeroštallamis, mii sáhtálii boahtit ee. davviriikkalaš sámesoahpamuššii.
Ruoŧa Sámedikki stivrra ságadoalli Håkan Jonsson atná ášši dehálažžan.
- Lea ártet, jos mis golmma riikkas leat iežálágan kriterat sápmelažžii. Min mielas dát lea buorre álgga ja mii doarjut dan, dadjá Jonsson SVT Sápmái.
Suoma Sámediggi sáddii cuoŋománus Norgga ja Ruoŧa Sámedikkiide reivve, mas dat evttohii ráđđádallagoahtit aktasaš sápmelašmeroštallamis. Suomas, Norggas ja Ruoŧas leat iežálágan njuolggadusat jienastusrievttis sámediggeválggain.
Jonsson dadjá, ahte Ruoŧa Sámedikkis lea ráđđádallamiidda čielga ulbmil, sii eai hálit váigaduhttit jienastuslohkui beassama. Jonsson baicce rievdadivččii Ruoŧa meroštallama lagabui Norgga meroštallama, man jelgii sápmelašvuohta sáhttá čujuhuvvot ovtta buolvva guhkkelebbui.
Gáldun: SVT Sápmi, Yle Sápmi