- Guottut eai jávkka ovtta sohkabuolvvas. Dakkár guovlluin, gos lea leamašan garra dáruiduhttinpolitihkka, sápmelaččat leat galgan leahkit measta čihkosis. Norggas lei almmolaš politihkka, man mielde sápmelaččat galge šaddat norgalažžan. Skuvllain oahpaheaddjit ožžo bonusiid, juos nagodedje jorgalit mánáid dárogielagin. Diet guoskái maiddái kvenaide, muitala Romssa Sámi Searvvi jođiheaddji Sauli Guttorm LK Ságaide.
- Vel otnenai mis leat politihkkárat geat vudjet áššiid sápmelaččaid vuostá ja sámivašši neahttačálašeami bokte lea lassánan, Guttorm lohká.
Romssa Sámi Searvvis lea leamašan dehálaš rolla ovddidit sápmelaččaid áššiid Romssas. Dat lea okta Norgga boarráseamos sámi servviin ja lea vuođđuduvvon 1969. Jagi ovdal Romsii ásahuvvui universitehta. Dalle bohte maiddái olu sápmelaččat gávpogii bargui dahje studeret. Sii dárbbašedje čoahkkanaddat. Ulbmilin lei doalahit sámevuođa. Maŋit áigge searvi lea ovddidan sámiid áššiid politihkalaččat, namalassii lokten sápmelaččaid ja sámegiela oidnosii. Dán áigge Romssa Sámi Searvi lea Norgga Sámiid Riikkasearvvi báikkálaš searvi.
- Sullii 70-logu loahpas bođii dárbu sámimánáidgárdái. Romssa Sámi Searvi lei ásaheame sámegielat beaivedivššu mánáide 80-logu álggus. Mánáidgárdi lei Romssa Sámi Searvvi vuolde vuosttáš jagiid. Lihkus Romssa gielda áddii, ahte mánáidgárdi lea dehálaš ja sii válde badjelasas dan doaimma 80-logu beallemuttus, čilge Guttorm.
Guttorma mielde Romssa Sámi Searvi lea leamašan hui aktiiva ja lágidan olu kultuvrralaš fálaldagaid, nu mo semináraid. Dat lea maiddái lágidan riikkaidgaskasaš álgoálbmotkonferánsa jagis 1984. Dan lassin ledje olu fálaldagat mánnábearrašiidda. Dán áigge Romssas lea vánhenfierpmádat, mii lea váldán badjelasas dieid doaimmaid. Sámi Searvi lea ovdal lágidan olu sámegielkurssaid. Go bođii ođđa čállinvuohki, girjjálašvuohta ja áviissat, de olbmuin bođii dárbu oahppat sámegiela.
- Mii leat lihkostuvvan daiguin doaimmaiguin maid mii leat álggahan, go earát leat váldán daid dál badjelasas. Dat leat šaddan fástadoaibman. Romssa Sámi Searvi álggii maiddái ovddidit sámiluohkká ja vánhenfierpmádat loahpahii plánendoaimmaid. 90-logus gielda álggii ásahit sámeluohkáid Báhpajávrri skuvlii. Oahpahus álggahuvvui 2000-logu álggus, Guttorm muitala LK Ságaide.
- Mun fárrejin Romsii vehá badjel 10 jagi áigi dassái ja serven dalán Sámi Searvái miellahttun. Háliidin oahpásnuvvát daidda sápmelaččaide geat dáppe orro. Moatti jagi geahčen ledjen stivrraláhttu. Jođiheaddjin lean leamašan maŋemuš vihtta jagi, muitala Guttorm gii lea Gáregasnjárgga guovllus eret.
Tromssan saamelaisyhdistys (Romssa Sámi Searvi)
Perustettu vuonna 1969. Tromssan yliopiston myötä kaupunkiin muutti saamelaisia opiskelemaan ja työskentelemään. Yhdistys perustettiin vahvistamaan saamelaisten yhteenkuuluvuutta.
Nykyisenä puheenjohtajana toimii Karigasniemen seudulta kotoisin oleva Sauli Guttorm.
Yhdistys on ollut mukana perustamassa saamenkielistä opetusta ja päivähoitoa Tromssan kaupunkiin. Se on myöskin aktiivinen kulttuuri- ja perhetapahtumien järjestäjä. Nykyisin järjestöllä on poliittinen asema.
Romssa Sámi Searvvi jođiheaddji Sauli Guttorm muitala, ahte sii leat bargan máŋggaid jagiid oažžut Sámi Viesu Romsii, muhto eai leat vuos lihkostuvvan. Jagi 2011 válggain gielda álggii vuostalásttit sámevuođa.
Dalle válljejuvvon sátnejođiheaddji Jens Johan Hjort oinnii sápmelaččaid dili ja manai iežas bellodaga vuostá.
- Beasaimet de čoahkkinastit Sámi Viesu birra. Diibmá čakčat ovdal ođđa válggaid, gielda luittii min geahččat ovtta vejolaš lanja. Dat lei betoŋgahálla, gos eai lean lásat gostege. Ášši lea ovdánan dál nu, ahte priváhtta oasálaš lea álggahan Sámi Viesu plánenproseassa. Sii leat ožžon ruhtadeami ovdaprošektii earret eará Sámedikkis ja Davvi-Norgga Seastinbáŋkku kulturfoanddas ja bálkáheame prošeaktajođiheaddji, gii sáhtášii bargagoahtit dainna, čilge Guttorm Sámi Viesu otná dili birra.