PO­LU­RA-ása­hus ii velge válm­mas: "Viid­dis ol­lis­vuoh­ta"

POLURA-hápmosa, dehege boazodoallo- ja lotnolasealáhusaid ráhkadusdoarjagiid ásahushápmosa, válmmaštallan lea velnai gaskan eanan- ja meahccedoalloministeriijas (EMM). Vaikko ieš POLURA-láhka lea leamašan fámus jo dán jagi álggu rájes, nu láhkii guoskevaš doarjagiid ii sáhte vel oažžut ovdalgo ásahus lea válmmaš.

- Dađi bahábut doarjagiid ii sáhte vel mieđihit ja dat lea šállošahtti dilli. Áššiid álo ii sáhte ovddidit dakkár fárttain, mii livččii sáváldahtti buohkaide. POLURA-ásahus lea oalle guhkki, go das leat 90 paragráfa ja dat lea viiddis ollisvuohta man gieđahallamii manná áigi, muitala Tanja Viljanen , gii lea hálddahusráđđeolmmoš EMM biebmo-ossodagas.

Viljanen buktá ovdan, ahte ásahushápmosa válmmaštallamii lea láktasan maid Eurohpá Uniovnna kommišuvnna oaidnu.

- EU kommišuvdna ferte dohkkehit vuosttažin ásahusa sisdoalu. Kommišuvnna dohkkehus láktasa ášši válmmaštallamii, nu ahte mii eat livčče muđuige bastán dáinna ovdánit jođáneappot. In leat sihkkar leago kommišuvnnas boahtán vel dohkkehus, oaivvilda Viljanen.

Ásahushápmosis sáhtii cealkit 31.01.2016 rádjái. POLURA-ásahusain mearridit ee. boazodoallo- ja lotnolasealáhusdálu sturrodagas, doarjagii gáibiduvvon ámmátdáiddus, huksen- ja fitnodatdoaibmaplánaid sisdoalus, boazodoalu hálddašeamis ja dietnasis.

- Dál čuovvovaččat mii mannat čađa daid cealkámušaid, mat leat dahkkon ásahushápmosa birra ja geahččat maid mii váldit vuhtii dain ja dasto mii mannat dainna ovddosguvlui. Mii ráđđádallat áššis vel sámedikkiin ja oalle sihkkarit maid bálgosiid ovttastumiin, das ahte makkár dat min loahpalaš evttohus boahtá leat. Dasto mii meannudit dan stáhtaráđđái, muitala Viljanen.

Ásahussii leat boahtime muhtin veardde rievdadusat. Earret eará skohtera dehe njealjejuvllaga oastimii oaivvilduvvon doarjja, mii rehkenastojuvvo daid hattis, loktanivčče 30 %:ii ja doarjaga sáhtálii ohcat skohterii golmma jagi ja njealjejuvllagii njealje jagi gaskas.