Suoma sámedikki stivrra lahttu Pentti Pieski oainnu mielde Suoma álgoálbmotpolitihka ovdáneapmi lea bisánan.
- Suoma stáhta eamiálbmotpolitihka ovdáneapmi lea geavatlaččat bisánan, sámiid rivttiid eai hálit ovddidit. Ráđđehusbellodagaid riikkabeaiáirasat deattuhit dan, ahte sii dorjot sámekultuvrra giellaealáskahttima bokte, Pieski cuiggoda.
Oaivegávpotguovllu sámediggeáirras Pieski čujuha jahkásaš ON álgoálbmogiid bissovaš forumii, mii álggii mannan vahkus.
- Suoma sámediggi oassálastá dán jagáš forumii iežas sáttagoddin. Ná sámediggi sáhttá hállat forumas eanet friija iežas jienain.
Pentti Pieski čalmmustahttá Kanada stáhtaministtara Justin Trudeau álgoálbmotpolitihka.
- Trudeau lea jođihišgoahtán Kanada nu, ahte Kanada lea aktiivvalaččat vuolgán ovddidit eamiálbmotpolitihkas. Varrasamos dieđu mielde Kanada áigu duohtandahkat ON eamiálbmotjulggaštusa geavadis, Pieski čállá.
- Livčče miellagiddevaš diehtit, mo Suopma áigu ollašuhttigoahtit eamiálbmotjulggaštusa, masa dat lea čatnašuvvan – vai áigugo? Sipilä ráđđehusprográmma go ii sisttisdoala makkárge ulbmiliid dahje čatnašumiid sámiid guovdu, Pieski dadjá.
Pentti Pieski váldá beali maid ságastallamii Grind-fakegáktevideo birra.
- Dan sadjái, ahte sámiid rievttit ovddiduvvojivčče ja Suopma čájehivčče, ahte dat guoddá ovddasvástádusas sámekultuvrra seailumis ja ovdáneamis, váldokultuvrra ovddasteaddjit ávkkástallet vehádatkultuvrra ja rivvejit alcceseaset sámiid kultuvrralaš symbolaid iežas dárkkuhusaid ovddideami várás. Dát dáhpáhuvvá Lappi mátkeealáhusas, čábbodatgilvvohallamiin ja dál maid dáiddara videos dálá dáidaga musea Kiasmas. Dás lea gažaldat eanetlogu válddi geavaheamis vehádaga, dán dáhpáhusas sámiid guovdu, Pieski čállá Facebook-siiddustis.