Hárjehallanguovddážiin lea jagi hohpoleamoš áigodat. Juovlabasiid maŋŋel olbmot dahket ođđajagilohpádusaid ja dábáleamos lea dearvvašlaš eallima álggaheapmi. Dasa gullet earret eará hárjehallan ja borrandábiid buorideapmi.
– Hárjehallamis leat máŋggat buorit bealit. Dat eastada buozalmasvuođaid, mat bohtet heajos eallindábiin. Hárjehallama bokte šatta buoret mokta ja dat váikkuha iešdovdui, muitala persovnnalaš hárjeheaddji Ingá Márjá Sarre .
Son muittuha, ahte go hárjehallá, de lea dehálaš maiddái borrat doarvái.
– Olbmo gorut dárbbaša proteiinna ja ruotnasiid. Lihkus sápmelaččat leat hárjánan borrat olu luonddubiepmu nugo bohccobierggu ja guoli, Ingá Márjá lohká.
Bohccobierggus leat olu vitamiinnat, proteiinnat ja oljosuvrrit, mat eastadit LDL-kolesterola. Dát boahtá ovdan Bálgosiid ovttastumi ruovttusiiddus.
Máilmmi Dearvvašvuođaorga-nisašuvdna (WHO) ávžžuha olb-muid geahpidit sohkkara geavaheami. Dat dagaha buoidivuođa, mii fas sáhttá mielddisbuktit heakkaváralaš buozalmasvuođaid. Sohkar maiddái vahágahttá bániid.
– Sohkar lea dego mirku gorudii, váruha Ingá Márjá.
Sohkkaris leat olu kaloriijat mat dagahit buoiduma. Sohkardávda lea buozalmasvuohta, mas vara sohkarárvvut leat ilá badjin.
– Láibi lea maiddái dakkár man ii galggašii borrat beare olu. Juos lea láibemiella, de áinnas borrát roavvaláibbi.
Ingá Márjá diehtá man birra hupmá. Son lea váldán hárjehallanoahpu Oslos ja bargan máŋga jagi hárjehallin.
Muhtimin sáhttá leahkit nu ahte ruovttubáikkis ii gávdno hárjehallanguovddáš. Dalle sáhttá hárjehallat ruovttus, searvat joavkohárjehallamiidda dahje vázzit tuvrraid olgoáimmus. Ingá Márjá lea jođihan joavkohárjehallamiid juo guhká.
– Mu joavkkuin leat dušše nissonolbmot. Dievddut liikojit eamb-bo hárjehallat iešheanalaččat nu mo sihkkelastit, čuoigat ja čiekčat spáppa. Smávva báikkiin lea dávjá nu ahte olbmot vudjet biillain juohke sadjái. Gávpotolmmoš fas vázzá olu. Dán áigge boazobargiin leat fievrrut maiguin johtet. Juos ii lihkkat iige bora albma ládje, gorut álgá seastit buoiddi. Galggašii muitit borrát jeavddalaččat, neav-vu Ingá Márjá.
Terveysvinkkejä
Henkilökohtainen valmentaja Ingá Márjá Sarre varoittaa sokerin vaaroista.
Sen sijaan hän suosittelee syömään paljon kalaa sekä poronlihaa, koska siinä on paljon vitamiineja ja proteiinia.
Liikunta estää sairauksia, jotka johtuvat huonoista elintavoista. Se vaikuttaa positiivisesti myös ihmisen mielialaan ja itsetuntoon.