Filbmadahkki Ásllat Paltto bagadallan ja govven Badjealbmá čalmmiiguin -dokumeantta pilohtaveršuvdna čájehuvvui vuosttas geardde almmolaččat Skábmagovat -festiválas mannan duorastaga. Dokumeanta muitala boazodili ja meahcieallivahágiid birra.
- Čájáhusa maŋŋá ollusat jearahedje filmma ođđasitčájeheami ja nu mun mearridedjenge bidjat filmma dál maid nehttii buohkaid oidnosii. Lean ožžon olu positiivvalaš máhcahaga filmma birra, muitala Paltto Lapin Kansa Ságaide.
Hálidivččii gávdnat buori buvttadeaddji ja bargojoavkku dokumeantafilbmii
Paltto muitala, ahte dát dokumeanta rahpá boazoolbmáid árgabeaieallima, man olggobeale olbmot eai dávjá beasa oaidnit dehe vásihit. Dokumeantta pilohtaveršuvdna lea 20 minuhta guhkki.
- Smihtten, ahte go dán váttis spiredillái ii leat reagerejuvvon ja go mus geardde lei jo nu ollu govvamateriála, nu hálidedjen almmustahttit dan pilohtahámis dál go dát ášši lea áigeguovdilis.
Paltto muitala, ahte son lea plánen guhkes dokumeantta bargama, muhto lea dál váldán bottu dan bargamis. Sivvan dasa leat Paltto hoahput studeremiin ja bargguin, muhto maid dat, ahte son háliidivčče gávdnat dokumentii buori buvttadeaddji ja bargojoavkku.
- Govvamateriála mus gal livčče doarvái guhkes dokumentii.
Hálidii duođaštusmateriála bohccuin, maid meahciealli lei goddán
Paltto bargá ieš boazoolbmán Sállevári bálgosis ja son lea guhká maid bargan journalistan. Dál son lea bargame dutkosa álgoálbmotjournalismmas. Son lea govven dokumentii materiála Sállevári bálgosis, Leammi álbmotmeahcis ja maid eará Suoma bálgosiin sihke Ruoŧas ja Norggas.
- Válden vuosttaš háve vuogádatkámera mielde meahccái jagis 2010, go hálidin duođaštusmateriála bohccuin, maid spire lei goddán. Dan rájes lea govven meahcis birra jagi. Maŋemus golmma jagi áigge jurdda dokumeantta bargamis lea nanosmuvván, dange dihte go čiekŋudahtti filmmat boazodilis ja eandalii spirevahágiin eai leat dahkkon guhkes áigái.
Dokumeanttas lea hearkkes materiála bohccuin, maid meahcieallit leat gaikon ja erenomážit getkkiin, mat goddet eanemusat bohccuid. Ášši lea áigeguovdilis dange dihte go eanan- ja meahccedoalloministeriija lea plánen sierra ásahusa getkkiid bivdimii, muhto dan válbmen lea gaskan.
- Hálidin čájehit dokumeanttas maid dan, ahte man olu barggu spiret dagahit badjealbmáide earret eará dange dihte, go sii ožžot buvttadusa dusse gávdnon ráppiin.
Paltto lea plánen, ahte olles dokumeanta livččii 60 minuhta guhki. Dat livččii eanas sámegillii, muhto tekstejuvvolii suoma- ja eŋgelasgillii ja vejolaččat ruoŧa- ja dárogillii.
Pilohta gávdno čujuhusas: https://vimeo.com/152389722.