Meahciráđđehusláhka lea dán vahkus nuppi gieđahallamis riikkabeivviin. Ovttastuvvan Našuvnnaid (ON) olmmošriekteáittardeaddji doaimmahat ávžžuhii mannan vahkus Suoma ráđđehusa ráđđádallat vel sámiiguin meahciráđđehuslágas.
- Mii leat fuolas, ahte dálá evttohus meahciráđđehusas geahnohuhttá sámiid álgoálbmotrivttiid sin árbevirolaš eatnamiid ja luondduriggodagaid ektui, cealká ON.
ON olmmošriekteáittardeaddji doaimmahat lea fuolas das, ahte meahciráđđehuslága ođasmahttimis eai leat váldán vuhtii sámiid friija, ovddalgihtii ja informerejuvvon miehtáma.
- Mii ávžžuhit Suoma ráđđehusa ráđđádallat viidábut sámiiguin dainna ulbmiliin, ahte sihkkarastit sámiid friija, ovddalgihtii ja informerejuvvon miehtama, ovdalgo ráđđehus dohkkeha ja ollašuhttá láhka- dehe hálddašandoaimmaid, mat sáhttet váikkuhit sámiide. Ráđđehus galgá maid sihkkarastit áššáigullevaš suodjemekanismmaid, ON cealká.
Meahciráđđehuslága nubbi gieđahallan bázii otne gaskan ja joatkašuvvá ihttin. Nubbi gieđahallamis jienastuvvo lága loahpalaš dohkkeheamis.