Sámi oahpahusguovddážis (SOG) Anáris álgá juovlamánus vuosttas geardde mánáidgárdeoahpaheddjiid lassiskuvlejupmi, mii váldá vuhtii sámegiela ja -kultuvrra. Skuvlejumi infodilálašvuohta lágiduvvo sámekulturguovddáš Sajosis bearjadaga diibmu 12–14.
- Skuvlejumi lágida Oulu universitehta pedagogihka dieđagoddi. Ohcanáigi skuvlejupmái lea 22.8.–22.9.2016 ja dasa válljejuvvojit 10 oahppi. Oahppiin, geat válljejuvvojit skuvlejupmái, vurdojuvvo sámegiela dáidu ja sis ii sáhte leat mánáidgárdeoahpaheaddji gelbbolašvuohta ovddit skuvlejumi vuođul. Skuvlejumis gárvána pedagogihka kandidáhtan ja dutkosii gullá mánáidgárdeoahpaheaddji gelbbolašvuohta, muitala SOG dieđáhusastis.
SOG muitala, ahte lassiskuvlejumis lea oaiveávnnasin pedagogihka, erenomážit árrabajásgeassin.
- Skuvlejumis giddejuvvo erenomáš fuopmášupmi sámi bajásgeassima ja árbevirolaš dieđu sihke giela oahppama pedagogihkalaš geavadiidda ja metodaide.
SOG muitala, ahte akta stuorimus hástalusain sámi árrabajásgeassimis lea sámegielat ámmátbargoveaga váilun, bargiin sullii bealis váilu formálalaš gelbbolašvuohta. Oahpahus- ja kulturministeriija lea mieđihan universitehtadási mánáidgárdeoahpaheaddjiskuvlejumi lágideapmái sierranas ruhtadeami.
Ohcan skuvlejupmái dáhpáhuvvá čujuhusas opintopolku.fi. Infodilálašvuođa sáhttá čuovvut čujuhusas http://sogku.fi/live2/.