Dán jagáš Anára heargegonagasgilvvuid njoarostangilvvu vuittii Jenni Kaaretkoski nissoniid luohkás áiggiin 2:09,50 ja Niko Näkkäläjärvi dievdduid luohkás ággiin 2:14,34. Kaaretkoski lea Sattasniemi bálgesis Soađegilis ja Näkkäläjärvi Neakkela bálgesis Eanodagas.
Dát lei Niko Näkkäläjärvi nubbi vuoitu Anára heargegonagasgilvvuid njoarostangilvvuin, go son vuittii maid jagis 2014. Dán jagi Näkkäläjärvi beassán finálii lei garra barggu duohken, daningo son bođii lávvordaga dollon rátkimis gávccadin, mii lei maŋemus sadji beassat finálii ja vuittii dušše 0,87 sekunddain ovccádin álgovuoruin báhcán Iisko-Henrik Näkkäläjärvi .
- Dan lea váttis dadjat, ahte manin finála manai olu buorebut go rátkin. Jurddahallen gal ovdal finála, ahte ii ábut heađástuvvat. Falli galgá leat, muhto ii jieris. Muhtumin lea buoret jurddahallat ovtta sekundda guhkibut ovdal njoarosteami, go álgit jierrásit dađistaga suohpana njámmama maŋŋel ja de njoarostit meaddel, muitala Niko Näkkäläjärvi dovdduid njoarostangilvvu birra.
Nissoniid luohkás nubbin bođii Elen Anne Sara Sállevári bálgesis áiggiin 2:17,83 ja goalmmádin Eeva-Mari Äärelä Kemin-Sompio bálgesis áiggiin 2:33,15.
Dievdduid luohkás nubbin bođii Per Johan Eira Lákkonjárgga orohagas áiggiin 2:42,74 ja goalmmádin Sami Siirtola Sattasniemi bálgesis áiggiin.
Rátkima falimus lei Mihkkal Máhtte Haetta áiggiin 1:48,36, muhto son bázii finálas viđádin.
Dán giđa dollojuvvojit njoarostangilvvut vel cuoŋománu 9. beaivve Dávgeváris (Tankavaaras) Soađegilis.
Dán jagáš heargegonagasgilvvuid gonagasluohká vuittii Taneli Paso heargi Pikalaaki Pintamo bálgosis. Nubbin falimus gonagasluohkás lei Esko Ahola heargi Tummanopsa Timisjärvi bálgesis ja goalmmádin falimus lei Uula-Petteri Somby heargi Ražán Báišduottaris.