Multidáiddár Nillas Holmberg lea almmustahttán davvisáme- ja eaŋgalsgielat diktagirjji, man namma lea The Way Back.
- Lean dieđusge ilus maiddái iežan dihtii, muhto ávvudan eandalit dán hárvenaš vejolašvuođa eaŋgasgiela hálliide guovllastit dálá sámegirjjálašvuođa máilbmái, muitala Holmberg girjji mearkkašumi birra.
Lágádusa siidduin muitaluvvo, ahte girjji divttain Holmberg muitala earret eará globálasišuvnna sápmelaččaide dagahan váttisvuođain. Dasa lassin Holmberg guorahallá buddhisttalaš filosofiija ja dološ sámi luondduoskku ovttaláganvuođaid.
- Girjjis leat ođđa divttat eaige dat leat almmuhuvvon mu ovddit diktačoakkáldagain, muitala Holmberg.
Divttaid leat jorgalan eaŋgalsgillii Niillas Holmberga lassin Lisa Jokivirta ja Clive Boutle .
– Girjji sáhttá dál jo diŋgot lágádusastan, Francis Boutle Publishers, muitala Holmberg.