NHL-jiekŋaskearrojoavku Winnipeg Jets lea miehtán Kanada álgoálbmogiid gáibádusaide ja gieldán guottiheddjiid garvodeamis fake dehege koanstaindiánagahpiriidda ruoktokámppain.
Ášši bođii ovdan mannan NHL-bajis, go Chicago Blackhawks -joavku galledii Winnipeg-gávpogis ja Blackhawks-joavkku guottiheaddji lei bidjan oaivái indiánagahpira.
Delle cree-álgoálbmogii gullevaš Winnipeg Jets -guottiheaddji dagai áššis virggálaš váidalusa Jets-organisašuvdnii. Guottiheaddji mielas koanstaindiánagahpira geavaheapmi lei loavkašuhtti.
Blackhawks galledii vuosttas geardde dán NHL-bajis Winnipegas duorastaga ja vel álgovahkus Jets-dieđihanossodat ilmmuhii Kanada oktasašradio CBC:i, ahte joavku ii áiggo gieldit indiánagahpiriid geavtima ruoktokámppain.
Winnipeg Jets goitge rievdadii oainnus justa ovdal kámppa ja ilmmuhii duorastaga, ahte indiánagahpiriidda garvodeapmi ii leat dohkálaš Winnipeg Jets ruoktokámppain. Winnipeg Jets -joavkku oamasteaddji Mark Chipman lei rievdadan oainnus dan maŋŋel, go son deaivvai Manitoba provinssa indiánaoaivámušaid searvvi jođiheaddji Derek Nepinak. - Mii leat álgoálgosaš mearrádusa maŋŋel ipmirdan buorebut man dehálaš áššis lea gažaldat ja leat mearridan, ahte dás ovddosguvlui mii eat suova koanstaindiánagárvvuid ja -gahpiriid geavtima min ruoktokámppain, muitala Jets-joavkku dieđihanhoavda Scott Brown CBC-kánalai.
Chicago Blackhawks -jovkui nama lea addán joavkku vuođđudeaddji Frederic McLaughlin jagis 1926. Son lei vuosttaš máilmmesoađis mašiidnagivvridivisiona kommándanta ja su divisiona jiellatnamma lei Blackhawks Division. Divisiovnna namma bođii vuohon beakkán Sioux-álgoálbmoga soahtenjunuš Black Hawkas, gii dáistalii sisabahkkejeddjiid vuostá dálá Illions oassestáhta guovllus.
Kanada Manitobas orrot olu álgoálbmogiid ovddasteaddjit. Okta buoremus NHL-spelliin, Montreal Canadiens -joavkku moallavákta Carey Price gullá Kanada Ulkatcho-álgoálbmogii.
Áššis vuosttažin muitalii Suomas Ilta-Sanomat
Boasttogeavaheapmi USA:s
USA:s ámmatválaštallanjoavkkut leat geavahan boastut álgoálbmotsymbolaid.
Máŋggat álbmotsearvvit ja politihkkarat leat gáibidan ee. NFL-joavku Washington Redskins nama rievdadeami.
Šlápma Redskins-joavkku birra lea jagiid mielde loktanan, eandalii dan maŋŋel go Redskins-joavkku oamasteaddji ilmmuhii boasttodieđu, ahte sii livčče máhkaš ožžon dohkkeheami joavkku nama geavtimii muhtin indiánasearvvis.