USA dinét dehege navajot ja Burma (Myanmari) unna álbmogat muitalit muitalusaideaset Skábmagovat-filbmafestiválas Anáris ođđajagimánu 21.-24. beaivve 2016.
Skábmagovat muitala, ahte Navajot leat dahkan filmmaid jo guhká, muhto Burma álbmogat easkka muhtun jagiid maŋŋelgo soahtefámut álget gulul geassádit. Festivála váldoguossin lea guhká filmmain bargan navajo-bagadalli Blackhorse Lowe , gean filmmat čájehuvvojit maid festiválas. Festiválii boahtá maid kachin-bagadalli Seng Mai Kinraw Burmas .
- Skábmagovat fállá maid pionerabargguid, nu movt vuosttaš álgoálbmotgillii dahkkon filmma Bangladeshas (Aung Rakhine Sihkkalan) ja vuosttaš ainuid muitalusa vuođul ráhkaduvvon animašuvnna (Tune Sugihara Shichigorosawan kettu). Áibbas áidnalunddot lea krimatatáragielat guhkesfilbma, Ahtem Seytablaevin Haytarma, mii muitala Krima tatáraálbmoga bággosirdmiin Gaska-Ásiai giđđat 1944, muitala Skábmagovat dieđáhusastis.
Kanadas fállet ee. guokte Lars von Trieris movtta ožžon Embargo-filbmaráiddu. Dain álgoálbmotbagadalliid joavku šattai dahkat filbmaset nuppiid eavttuid mielde. Šáŋŋerat leat komediijas soaiggusfilbmii ja minimusikálii.
Skábmagovain čájehuvvo maid Suvi West ođđa 70-minuhta dokumentárafilbma Spárrooabbán.
- Spárrooabbán lea persovnnalaš filbma su oappás, guhte lea válljen geainnu, mii lea konservatiivvalaš sámeservodagas tabu: ráhkisvuohta nuppi nissonii. Vástádusaid ja dohkkeheami ohcalettiin soai deaivvadeaba jávohisvuođa bávttiin, muitala Skábmagovat dieđáhusastis.
Prográmmas lea maid Amanda Kernell oanehisfilbma Stoerre vaerie, vuosttaš sámi filbma, mii lea válljejuvvon beakkán Sundance-festivála prográmmii USA:s. Golggotmánus filbma vuittii oanehisfilmmaid gilvvu ImagineNative-festiválas Kanada Torontos.
Festivála rahpandoalut leat ođđajagimánu 21. beaivve Guovssahasteáhteris.
Gáldun: skabmagovat.fi
Čájálmas atomfápmorustega bávkkeheamis
Skábmagovaid rahpandoaluid maŋŋel Giron Sámi teahter čájeha Sajosis ođđa čájálmasas Reáktor.
Dat govvida, movt Suoma čihččet atomfápmorusttet Anáris bávkkeha ja bidjá das ceavzán olbmuid suokkardallat stuorra gažaldagaid.
Kenneth Hætta lea čállán čájálmasa ja dan lea bagadallan Anita Suikkari ja dat tekstejuvvo suomagillii.