Ellen Inga Turi bealuštii bearjadaga Ubmi universitehtas iežas nákkosgirjji, man namma lea Stáhta stivren ja árbevirolaš ekologalaš máhttu boazodoallohálddašeamis.
Nákkosgirjjis lea guorahallojuvvon sámi boazodoalu Oarje-Finnmárkkus, Davvi Norggas ja nenetsa boazodoalu Jamalnjárggas, Oarje-Sibiras.
- Dát leat stuorámus boazodoalloguovllut máilmmis, sihke olbmuid ja ealuid dáfus. Dain guovlluin leat ovttaláganvuođat, muhto maid nuppe dáfus stuora erohusat, nugo erohusat politihkalaš organiseremis ja stivrenvuogádagain, muitaluvvo dieđáhusas mii gávdno reindeerherding.org neahttasiiddus.
Dieđáhusas muitaluvvo, ahte Turi bohtosat čájehit, ahte váikko eiseválddit iežaset gulaskuddanproseassain dávjá váldet mielde boazodoalu iežas organiserenovttadagaid, nugo siidda, de das fuolatkeahtta, sii eai ane boazodoalu árbevirolaš máhtu vuođđun mearrádusaide dehe stivrejupmái.
- Čilgehussan dasa lea go stivrenprinsihpat leat formaliserejuvvon dainna lágiin ahte ii leat sadji eará máhttovuogádagaide go oarjemáilmmi dutkanmáhttui, ja iige leat sadji eará organiserenvugiide go hierárkkalaš dahje eanetlogu stivremii. Boazodoalloealáhusa hálddašeapmái dárbbašuvvo ollislaš strategiija dasa movt árbevirolaš máhtu galgá oažžut vuođđun stivrenproseassaide danne go ii leat doarvái dušše atnit mielhálddašeami ja dábálaš gulaskuddanproseassaid, muitaluvvo dieđáhusas.