Bálgosiid ovttastumi stivrra várreságadoalli Nils-Heikki Näkkäläjärvi buvttii ovdan mánnodaga Roavenjárgga boazoparlameanttas dollon sáhkavuorustis ođđa meahciráđđehuslága dagahan eahppesihkkarvuođaid sámi boazodillái.
- Ođđa meahciráđđehusláhka ja dan válmmaštallanproseassa leat leamašan ja leat velnai bávččas áššit sámeguovllus. Dat leat dagahan olu eahpesihkkarvuođa árbevirolaš sámi boazodili seailumii, muitalii Näkkäläjärvi.
Näkkäläjärvi buvttii ovdan, ahte sámeguovlluid bálgesat leat fuolas das, ahte maid Meahciráđđehusa vuovdedoallodoaimma sirdašuvvan fitnodatdoaibman sáhttá dagahit boazodillái.
- Fitnodagain leat buvttadusgáibádusat ja daid ollašuhttima dihte šaddet lasihit vuovdečuollamiid. Luonddudilálaš vuvddiid sirdašuvvan vuovdedoallogeavahussii sáhttá mearkkašit dan, ahte dát guovllut eai leat šat boahtteáiggis boazodoalu geavahusas, muhto doppe boahtá leat earánai eanangeavaheapmi, oaivvilda Näkkäläjärvi.
Näkkäläjärvi buvttii maid ovdan sámeguovllu boazoolbmáid balu das, ahte guohtuneatnamat gáržžiduvvojit.
- Geavvágohan dás vuohon nu, ahte bohccot ja boazoolbmát fertejit addit lasi saji eará doibmiide. Massojuvvon guohtuneatnamiid ii sáhtte buhtadit mainnagelágiin, loahpahii Näkkäläjärvi.
Roavenjárggas mánnodaga dollon boazoparlameanta streamejuvvui interneahtta bokte.