Otne lea doavttergráda nákkáhallan Sámi allaskuvllas, mas Mikkel Nils M. Sara bealušta dutkanbarggus “Siida ja siiddastallan. Å være en siida - om forholdet mellom siidatradisjoner og videreføringen av siidasystemet".
- Siidadoaba lea oahpis miehtá Sámi ja boazoealuid siidavierut leat leamaš eallevaččat gitta otná rádjái, iešguđet vugiin. Seammás daddjo ahte siidavuogádat ii leat šat doaimmas, ja ahte boazoguohtundistriktavuogádat lea beassan báidnit vugiid mainna lágiin ipmirdišgoahtit siidavuogádaga. Mun lean guorahallan makkár dieđut leat boares vuogádagain ja čájehan makkár doahpagat ja makkár árbevirolaš máhttu eallogohkkema birra ii leat šat vuoruhuvvon seammá vuohkái go ovdal, aŋkke almmolaš hálddašeami olis, dadjá doavttergrádastipendiáhtta Sara.
Sámi allaskuvlla dieđáhusa jelgii Norggas lea dál siida dohkkehuvvon riekteguoddi ja boazobargodoaimmaheaddji ásahussan lága bokte. Politihkka ja almmolaš hálddašeapmi atná iežas gova ja ipmárdusa das mii lea sámi boazodoallu.
- Dat váikkuha dasa movt duohta dilis lea siida ja movt siidavuogádat vuhtiiváldojuvvo. Gažaldahkan lea makkár lahkonanvugiin ja čilgenmálliin galgá siida ipmirduvvot ja vuhtiiváldojuvvot jus dat galgá joatkahuvvat siidan, muitaluvvo Sámi allaskuvlla dieđáhusas.
- Siida ii galggaše leat dušše ásahussan mii galgá doaibmat heivehuvvon oassin dan hálddašanvuogádagas ja boazodoalloipmárdusas mii ain lea joatkahuvvan, loahpaha Sara.
Gáldun: samas.no