Sámemusihkkajoavku Ánnámáret Ensemble almmustahttá nuppi skearrus Gollehelmmot borgemánus. Skearru sisttisdoallá logi ođđa bihtá, maid Ánnámáret Ensemble -joavkku lávlu, musihkar Anna Näkkäläjärvi-Länsman lea komponeren. Son lea maid čállán skearru gait davvisámegielat teavsttaid.
Näkkäläjärvi-Länsman muitala, ahte ođđa skearru teavsttat gieđahallet persovnnalaš temáid, muhto seammás maid sámi servodaga ja áitagiid mat čuhcet sámi eallimii.
- Lean jurddašan ná maŋŋelgihtii, go ledjen čállán teavsttaid ja ieš analyseren daid, ahte teavsttaid temán lea sámi eallin, ahte makkár dat lea dán áigge ja várra maiddái nissonolbmo eallin. Dat persovnnalaš teavsttat muitalit ovdamearkka dihte sámi heajaid birra, muhto de nuppedáfus skearrus leat dakkár teavsttat mat váldet beali servodatlaš ássiide ja politihkkii, muitala Näkkäläjärvi-Länsman.
Ođđa skearru almmustahttinkonsearta dollojuvvo Ijahis idja -festiválas Anáris 20.8.2016.
Ánnámáret Ensemble -joavkku vuosttas skearru Beallječiŋat almmustuvai giđđat 2011. Joavku ovttastahttá musihkastis sierralágan temáid: sámi lávlunárbevieru, akusttalaš álbmotmusihka ja ođđaáigásaš elemeanttaid.
Ánnámáret Ensemble -joavkkus čuojahit Johanna Juhola (geasánas), Janne Lappalainen (busuki, gitárra, sopránosaksofovdna), Sami Kurppa (keyboard) ja Ilkka Heinonen (bássa). Skearru lea buvttadan Sami Kurppa ja dan almustahttá Tuupa Records Oy.
- Mus lea sullii seamma joavku čuojaheame dás go vuosttas skearrus. Lean giitevaš das, ahte sii hálide ovttasbargat muinna ja čuojahit mu musihkka, go sii leat ámmátmusihkkarat. Mielde lea ođđa pianista ja son lea maiddái buvttadan albuma. Son lea maid bargan dihtorin programmerejuvvon jienaid, mat mu mielas viiddidit albuma jietnamáilmmi, muitala Näkkäläjärvi-Länsman.
Son lea duđavaš dasa, ahte su komponerenvuohki lea ovdánan ja joavkku musihkkamáilbmi lea maid ožžon ođđa elemeanttaid.
- Dát ii leat nu lahka árbevirolaš álbmotmusihka go vuosttas skearru. Dás leat eambbo váikkuhusat earret eará pop-musihkas, muitala Näkkäläjärvi-Länsman.
Näkkäläjärvi-Länsman lea solokarrieras lassin doaibman earret eará sámekultuvrra leanadáiddarin ja Ijahis idja -festivála dáiddalaš jođiheaddjin. Son lea válbmanan klarineahttačuojaheaddjin Sibelius-Akademiijjas Helssegis.
Ensembleltä uusi albumi
Ánnámáret Ensemble julkaisee toisen levynsä Gollehelmmot (Kultahelmet) elokuussa.
Albumi sisältää kymmenen uutta kappaletta, jotka Anna Näkkäläjärvi-Länsman on säveltänyt. Hän on myös kirjoittanut albumin kaikki pohjoissaamenkieliset tekstit.
Näkkäläjärvi-Länsman kertoo, että uuden albumin tekstit käsittelevät sekä henkilökohtaisia että yhteiskunnalisia ja poliittisia aiheita.
Ánnámáret Ensemblen debyyttialbumi Beallječiŋat (Korvakorut) ilmestyi keväällä 2011.
Albumin julkaisukonsertti järjestetään Inarissa 20.8.2016.