Sámeáššit eai máinnašuvvo ollenge Juha Sipilä (guovd) ráđđehusprográmmas ja danin Jari Lindström (vs) preassadieđáhus leage mearkkašahtti. Vuođđosuopmelaš ministtar lohpida dieđáhusastis, ahte ráđđehus boahtá ovddidit sámeáššiid.
Lindström lea plánen vihtta doaibmabiju sámiid dihte. Vuosttas lea ILO 169 -soahpamuša ratifiserema válmmaštallama joatkin.
- Lea dárkkuhus, ahte mannan válgabajis addon ráđđehusa evttohus ILO-soahpamuša birra dollo badjin jagi 2016 riikkabeivviin.
Dát lea ráđđehusa evttohus, masa gullá nu daddjon čilgehusoassi. Čilgehusoassi dárkkuha dan, ahte sámeguovllu eananoamastanrivttiide eai boađále rievdadusat, vaikko ILO-soahpamuš boađálii Suomas fápmui (LK Ságat 18.11.2014).
Nubbi doaibmabidju lea dutkamuš, mii dahkko jagis 2016. Dat láktasa ILO-soahpamuššii. Dutkamušas veardádallet álgoálbmotmeroštallama ja eananrivttiid miehtá máilmmi. Goalmmát ja njealját namuhuvvon doaibmabijut leat ovddidit dakkár lágaid, mat gusket sámegiela ja Sámedikki sajádaga. Viđát lea ovddidit davviriikalaš fidnu sámesoahpamušas.
- Sámit lea vuođđolága mielde álgoálbmot. Dál lea dehálaš ságastallama bokte ohcat oktasaš oainnu sámiid sajádaga ja rivttiid ovddideamis lágas jagiid, Lindström kommentere ášši dieđáhusas.
Davviriikalaš sámi tv-ođđasiin bearjadaga Lindström dajai lassin, ahte fakkadeapmi sámeáššiid birra lea joatkašuvvan ila guhká ja ášši galgá oažžut muhtinládje lohppii.