Meahciráđđehuslága nuppi gieđahallamis Gurotlihtu ja SDB riikkabeaiáirasat evttohe vuohon lága hilguma ja ođđasit válmmaštallama. RÁB riikkabeaiáirasat gáibidedje ain earret eará sámečuoggáid máhcaheami láhkaevttohussii. Nuppi gieđahallama ságastallamisge bohte vuohon sámiid rievttit ovdan.
Riikkabeaiáirras Mats Nylund (ráb) šállošii, ahte riikkabeaivvit eai geavtan meahciráđđehuslága vuosttaš gieđahallamis liibba buoridit sámiid sajádaga ON olmmošriektekomitea ja vuođđoláhkaváljagotti ávžžuhusaid vuođul.
Hanna Sarkkinen (gur) dajai, ahte ođđa vuovdedoallofitnodaga vuođđudeapmi, sámečuoggáid váilun ja goalmmát bálanssa hutkan bohciidit fuola. Satu Hassi (ruon) imaštalai, ahte jos lága ulbmilin lei fal vuođđudit ođđa vuovdedoallofitnodaga, nu manin láhkii galggai lasihit osiid, mat ee. geavatlaččat geahnohuhttet sámiid rivttiid bealušteami.
Mikko Kärnä (guovd) vástidii, ahte čuoččuhusat das, ahte dát láhka geahnohuhttá sámiid rivttiid, eai doala deaivása. Su mielas sámiid rievttit buorránit láhkii evttohuvvon gielddaid ráđđádallangottiid bokte. Hassi hálidii muittuhit, ahte vaikke sámiide guoski láhkačuoggát eai rievddage, nu sámiid árbevirolaš ealáhusaid ja erenoamážit boazodoalu eatnamiid hálddašeaddji rievdá ja danin láhka boahtá geavatlaččat geahnohuhttit sámiid eallima.
Hanna Halmeenpää (ruon) mielas lea boastut dadjat, ahte láhkaevttohus buorida sámiid sajádaga, daningo sámit eai leat evttohuvvon gielddaid ráđđádallangottiin eanetlogus muhto baicce unnitlogus.
Meahciráđđehuslága gieđahallan bázii gaskan disdaga. Lágas jienastuvvo loahppavahkus.