Olu sagástahttán meahciráđđehusláhka lea dál sáddejuvvon cealkinláhkai. Dán ođđa láhkaevttohussii ii leat goitge máhcahuvvon sámekulttuvrra geanohuhtingielddus, mii lei ovddit ráđđehusa evttohusas meahciráđđehusláhkan.
Eanan- ja meahccedoalloministeriija lea bivdán cealkámušaid badjel 70 eiseválddis ja organisašuvnnas. Cealkámušat leat bivdojuvvon earret eará iežá ministeriijain, rádjegozáhusas, Meahciráđđehusas, Musealágádusas, gielddain, bálgosiid ovttastusas, sámedikkis ja nuortalaččaid giličoakkámis.
Bovdehus cealkit meahciráđđehuslágas lea sáddejuvvon maiddái Suoma luonddusuodjalanlihttui, Lappi gávpekámmárii, Suomen Latu ry:i, Duottar-Lappi Ovddideapmi ry:i, Anára lapinkylä Lapinkyläsearvi ry:i, Anarâšah rs:i ja Suoma Meahcástanlihttui.
Cealkináigi lea skábmamánu 24. beaivve rádjai. Ođđa meahciráđđehusláhka galggalii boahtit fápmui njukčamánus 2016.
Eanan- ja meahccedoalloministeriija lei áigon doalvut láhkaevttohusa riikkabeivviide cealkámušaid haga. Sivvan lei dat, ahte ođđa láhkaevttohus cuiggoduvvui nu olu golmma gullandilálašvuođas golggotmánu beallemuttus.
Golggotmánu gullandilálašvuođain iešguđet bealit adde badjel 100 cealkámuša meahciráđđehusláhkaevttohusas. Earret eará sámediggi gáibidii, ahte láhkii galgá máhcahit sámekultuvrra geahnohuhttingildosa, man Jyrki Katainen ráđđehus lei dasa evttohan.
Láhkahámus lea interneahtas siiddus mmm.fi/lausunnolla.