Márkomeannu-festivála jođiheaddji Marit Kristine Eilertsen muitala, ahte sii leat dán dálvvi áigge ohcan nuoraid geaidda sii hálidit fállat liibba válbmet ja ovdanbuktit šuoŋaid Márkomeannu-festivála lávddis.
- Boahttevaš násttit leat dál válljejuvvon. Sii leat Emma Elliane Oskal Valkeapää , Hildá Birget Länsman , Elin Kristina Oskal , Ella Marie Hætta Isaksen ja Natalie Carrion , muitala Eilertsen.Emma Elianne Oskal Valkeapää lea 16 jagi ja lea Guovdageainnus eret.
- Son lea lávlun ja čallan lávlagiid dan rájes go lei unni ja lea juo lea oassálasttán MGP jr. -gilvui jagis 2011. Son lea maid oassálasttán UKM:ai, Sápmi Talent:ii ja Nordic Light festiválii. Son almmuhii su vuosttaš skearru cuoŋomanus man namma lea "Dovddut eai gielis". Son oassálastá dal Nuoraid Sessions:ii vai beassá ovddidit iežas musihka ovttain eará nuoraiguin geat beroštit musihkas ja vel oažžut veahki profešunealla musihkkariin, muitala Eilertsen.
Hildá Länsman lea 22 jagi ja lea eret Ohcejogas.
- Son lea juo musihkkaoahpuid bokte iežas karrieara bidjan johtui, ja son sihke lávlo ja juoigá. Solju joavkkus lea mielde, geat dán jagi oassálaste suoma MGP gilvvus. Su mihttu lea sihkkarastit bistevašvuođa sámi gielas ja juoiganárbbis, addin bokte sámi álbmogii musihka ja musihkkahistorjá, muitala Eilertsen.
Elin Kristina Oskal lea 20 jagi ja lea eret Saltaduottaris Nordlánddas.
- Son čállá lávlagiid máŋga gillii, muhto liiko buoremusat čállit sámegilli. Su mielas lea álkit ovdanbuktit ja čilget dovdduidis eatnigillii. Son liiko sihke čállit teavsttaid, lávlut ja juoigat. Šaddá gelddolaš oaidnit maid Elin áigo ovdanbuktit Márkomeannus, muitala Eilertsen.
Natalie Carrion lea 20 jagi ja lea eret Ubmis Ruoŧabeale Sámis.
- Lagamus su váimmu lea musihkka ja su kultuvra. Sus lea áŋggaštus doalahit iežan árbbi juohke lávkkis maid váldá. Son lea bargan viššalit vai šaddá nu buorre artistan go vejolaš, ja lea gearggus gávnnahit maid Sápmi ja Márkomeannu ovdanbuktet. Son illuda juohkit iežas lávlagiid Márkomeanu lávddis geasset, muitala Eilertsen.
Ella Marie Haetta Isaksen lea 18 jagi ja lea Deanus eret. Dál son orru Álttás gos vázzá drámálinjjá.
- Son vuittii dán jagáš Sámi Grand Prixa. Dasa lassin son lea oassálastán Scene Finnmárkku/ Ung Artist NOW! prošeavttas, ja mátkkoštan Arctic Winter Games oktavuođas ovddastit sámi kultuvrra. Son ráhkada alternatiiva popmusihka, ja sus lea áigumuš bargat musihkain ovddasguvlui, muitala Eilertsen.
Márkomeannu-festivála dollojuvvo Evenáššis Norgga Sámis 28.-30. beaivve suoidnemánus.