Márkomeannu-festivála aktavuođas Skániid girjie -lágádus almmustahttá guokte girjji, main nubbi gieđahallá dáruiduhttima ja nubbi biebmosiidaproblematihkka. Girjjit mat almmustahttojuvvojit leat Beate Heide čállán Cuvkejuvvon váibmu (mánáidgirji) ja Magne Einejord čállán Áiggit iežáhuvvet (jietnagirji). Dát leat 58. ja 59. girjjit maid Skániid girjie almmustahttá.
Einejord girji govve Márkosámi birrasa soađi mannjel
- Románas govvejuvvo márkosámi biras garra áiggis gonne dáruidduhttin lei rievttes bálggis rievttes eallimii. Girjji "mon" lea gaskaahkáhas sámi nuorra vuosttaš logi jagi maŋŋel nuppi máilmmesoađi. Beassat čuovvut máŋggaid bálgáid dáruiduhttimii ja dáruiduhttima vuoste. Čálli vuoseha birrasa man máŋgasat sáhttet dovdat: skovllát, hálddahus, kántuvrrat, áššemeannodeamit, poletihkat, oppalaš servvodat ii veahášge vuhtii váldde sámi višu, sámi árvvuid ja ávvira, muitala Márkomeannu festiválajođiheaddji Marita Kristin Eilertsen girjji birra.
Heide girjji fáddán lea biebmosiidaproblematihka.
- Dat lea váttis fáddá Norggas, go lea čadnon sihke heahpadii, sivalašvuhtii ja ovddasvástádussii leahkit sihke biebmománnán ja biologalaš vánhemin guhte lea mássán ovddasmorraša mánáide. Girjjis lea máná perspektiiva ja muitala makkár hástalus lea mánnái ipmirdit iežas dobdamušaid ja reakšuvnnaid ja makkár ipmárdus biebmovánhemis ferte leahkit jus galgá hukset dorvvu. Girji loahppá positiivvalaččat Lisái, go lohkki čuovvu su ohcama váibmobihkiide, dálkkasin cuvkejuvvon váibmui, muitala Eilertsen.
Márkomeannu-festivála dollojuvvo Evenáššis Norgga Sámis 28.-30. beaivve suoidnemánus.