Dán jagáš Heahtá Márjjábeivviid oktavuođas Johtti Sápmelaččat rs. ordne ovttas Sámi allaskuvllain Sámi boazodoallu -seminára.
- Seminára dárkkuhussan lea muitalit sámi boazodoalu iešvuođaid birra. Logaldallit bohtet muitalit makkár sámi boazodoallu lea, mii lea dan vuođđun ja mii lea dagahan ahte dat lea ceavzán. Semináras gieđahallat maiddái Suoma sámi boazodoalu hástalusaid ja organiserema, muitala Inger-Marja Gaup-Eira dieđáhusas.
Semináras logaldallet Sámi allaskuvlla árbevirolaš máhtu ja boazodoalu dutki, filosofiija doavttir Inger-Marja Gaup-Eira, servodatdiehtagiid doavttir Mihkkal-Niillas Sara ja riikkaidgaskasaš oktavuođaid, ovttasbarggu ja rivttiid studeanta Inka Saara Arttijeff .
Seminára ordnejuvvo Duottar-Sámi luondduguovddáš Skierris Heahtás bearjadaga diibmu 14.00-17.00.
Márjjábeivviid prográmmas leat maid, dego dábalaččat lávejitge, heargegilvvut ja musihkkadáhpahusat. Lávvordaga álget World Cup -heargegilvvut diibmu 11.00 ja diibmu 14.30 leat Gollegiehta-njoarostangilvvut nissoniid ja dievdduid luohkás. Gollegiehta-gilvu lágiduvvui vuosttaš geardde diibmá. Gilvvus njoarostit johtti stoalppuid ja njoarostemiid čuoggát rehkenastojuvvojit oktii. Gollegiehta-gilvvu bálkkašupmin lea sihke dievdduid ja nissoniid luohkás vuoitái 500 euro, nubbái 200 euro ja goalmmádii 100 euro. Gilvvut leat Ovnnesjávrri nalde gieldda gáttis Heahtá gilis.
Lávvordaga musihkaprográmma álgá mánáid duhppen- ja juoiganbottuin, man doallá Petra Magga-Vars Skierris diibmu 12.00. Vuollikkas dollo Sámi musihka konsearta diibmu 18.00, gos loaiddastit Niko Valkeapää ja Sámi oahpahusguovddáža oahppit. Márjjábeaivvedánssain eahkes Hetta Hoteallas čuojaha Iŋgá-Máret Gaup-Juuso joavku Mingá.
Sotnabeaivve ordnejuvvojit diibmu 11.00 Gollegiehta-njoarostangilvvut mánáide ja nuoraide ja diibmu 11.30 álget heargegilvvuid finálat. Sáme - ja suomagielat ipmilbálvalus dollo Heahtá girkus sotnabeaivve diibmu 11.00. Márkanbáiki lea rabas Heahtá boares skuvllas sihke lávvordaga ja sotnabeaivve.