Márjjá­beaiv­vit čohk­ke­jit fas már­ka­niid­da

Vaikko dán jagi eai leat heargegilvvut de goittotge lea buorre prográmma Heahtá Márjjabeivviin. Dán jagi márkanat lágiduvvojit Heahtá skuvlašiljus.

- Sávvat ahte gielddus lea dušše dán jagi, vai sáhttit lágidit heargegilvvuid boahtte jagi, muitala Minna Näkkäläjärvi Johtti Sápmelaččat searvvis.

Skuvlašiljus lea lihká vejolašvuohta vuodjit herggiiguin.

Márjjabeivviid rahpá duorastaga Ávžžášjávri - Gáijjoga gilli –čájáhus ja girjealmmuheapmi. Govvejeaddji Jyrki Kallio-Koski fiinna govat muitalit Ávžžášjávrri sámi giláža eallimis 40 jagi áiggis. Čájáhus lea ovdan Skierri, Duottar-Lappi luondduguovddážis cuoŋománu lohppii.

Váldolágideapmi heargegilvvuid sajis leat Gollegiehta -njoarostangilvvut.

- Eai sáhte leat sámi márkanat jos mis eai leat gilvvut, bohkosa Näkkäläjärvi.

Lávvardaga leat rátkimat ja finála lágidit sotnabeaivve.

- Dat šaddá vehá gelddolaš go buohkat leat seamma luohkás, čilge Näkkäläjärvi.

- Mii leat bargamin ain loahpalaš njuolggadusaid, joatká Näkkäläjärvi.

Vuoitun ii leat dušše pokála muhto Irbis T150 čakčaskohter. Almmuhusaid váldet vuostá 24.3. rádjái ja oasálastinmáksu máksojuvvo báikki nalde.

Márjjábeivviin leat mánát maid váldojuvvon vuhtii. Mánnu –mánáid kulturguovddáš lágida lávvardaga mánáide buđaldan- ja juoiganbottu beaivit Skierris. Juoiganbottus juoigá Wimme Saari .

Dán jagi lágiduvvo konsearta vehá márkana olggobealde Vuollikkas, gos guoimmuhit Sámi musihkkaakademiija sihke Wimme ja Rinne.

- Sámi musihkkaakademiija čuojaha skuvlla konsearttas ja lágidit juoiganlávvu -musihkkabargobájiid, lohká Näkkäläjärvi.

Sámi musihkkaakademiija lágida juoiganlávvu –bargobáji, mii lea oaivvilduvvon buohkaide, geain lea beroštupmi.

Nu mo lávege, de vahkuloahpas lágiduvvojit Heahtá hoteallas Márjjabeaivve dánssat ja suohtastallan. Eahkes guoimmuhit Sápmi Groove, Sámi musihkkaakademiija ja Ailu Valle & Trio Boogiemen.

Márjjábeaivvit Heahtás 24-26.2.2017. Olles prográmma gávdná čujuhusas http://www.marianpaivat.fi/

Mistä on kyse?

Marianpäivät kutsuvat taas markkinoille

Ohjelmassa on Raittijärvi – näyttely, Gollegiehta (kultakäsi) – suopunginheittokisat, monia konsertteja, ohjelmaa lapsille, Joikulaavu kilpailu ja illalla Marianpäivän tanssit.

Perinteiset Marianpäivän markkinat järjestetään jälleen Hetassa 24-26.2.2017