Dán jagáš Skábmagovain guossástalle oktiibuot 3100 olbmo, main eahketdoalut geasuhe 350 olbmo. Festiválain čájehuvvoje maid eanet filmmat go goassege ovdal, oktiibuot 95 filmma.
- Báikkálaš gehččiid beroštahtii earenoamážit Skábmagovaid álggahan duorastateahkeda čájáhus boazodoalu birra. Čájáhusas čájehuvvui Porot kuuluvat tuulelle -filbma ja Aslak Paltto govvádus boráspirepolitihkas badjeolbmo čalmmiiguin, muitala Skábmagovaid festiválajođiheaddji Ánne-Kirste Aikio. Aikio muitala maid, ahte lávvardaga Sajosa filbmasále lei dievva go Suvi West Sparrooabbán-filbma čájehuvvui vuosttaš geardde. West filbma čájehuvvo maid dán vahkus DocPoint-filbmafestiválas Helssegis.
- Giitosa oaččui maid blackfoot-sápmelaš bagadalli Elle-Máijá Tailfeathers filmma Bihttoš, mii čájehuvvui earret eará lávvardaga muohtateahteris, muitala Aikio.
Skábmagovaid festiválafálaldat maid viiddiduvvui teáhterdáidaga beallái, go duorastaga ruoŧasápmelaš Giron Sámi Teahter buvttii Anárii boahtteáiggičájálmasas Reaktora.
- Bearjadaga dollui maid ságastallandilálašvuohta fáttás, mii váivvida máŋggaid sámeváhnemiid, namalassii sámegielat mánáidprográmmaid váilun. Dilálašvuođas plánejedje mánáidprográmmaid dubbema, muitala Aikio.
Jagi 2017 Skábmagovat lágiduvvojit 26.-29.1.2017 ja temán dalle lea maori-álbmot.
Galdun: skabmagovat.fi