Dorvvolašvuođa ja kemikáladoaimmahat Tukes lea mieđihan málbmaohcanlobi Geologiija dutkanguovddážii (GTK) Leahttáseanu guvlui Giehtaruohttasii, Eanodahkii. Lohpi lea fámus njeallje jagi. Dát lea vuosttas geardi, go málbmaohcanlohpi lea addon sámeguvlui ođđa ruvkelága áigge.
GTK dadjá ohcamušastis, ahte dutkamušat sisttisdoalale bovremiid ja vejolaččat guovllu geofysalaš mihtidemiid. GTK áigu čađahit dutkamušaid dálvet. Lohpi addá GTK:i rievtti dutkat, válbmet ruvkedoaimmaid ja ohcat málmmaid vai gávdnet guovllu minerálaid. Málbmaohcanlohpi Leahttáseanus ii atte lobi álggahit ruvkedoaimmaid. GTK dieđuid mielde guovllus lea vejolaš gávdnat veaikki, ruovddi dehe golli.
Lohpi lea addon Leahttáseanu guvlui, mii lea boazodoalloguovlu, oassi meahcceguovllu, Natura-guovlu ja jekkiidsuodjalanguovlu. Jekkiidsuodjaleami dihte GTK dárbbaha vel lobi birasministeriijas, ovdalgo dat sáhttá álgit ohcat málmmaid. Lätäs1-nammasaš málbmaohcanguovllu sturrodat lea sullii 390 hektára.
GTK álggii ohcat dán lobi jo jagis 2014. Giehtaruohttasa bálggus vuostálastii málbmaohcanlobi. Sámediggi celkkii golbmii jagiin 2014–2016, ahte Tukes ii leat árvvoštallan lobi váikkuhusaid sámekultuvrii, dego ruvkeláhka gáibida. Danin Sámediggi ii sáhte addit iežas oainnu iige lohpeohcamuša sáhte gieđahallat.
Dán málbmaohcanlobis lea vejolaš váidit Davvi-Suoma hálddahusriektái 8.8.2016 rádjai.
Čálli lea Giehtaruohttasa bálgosa osolaš
Sáhkii dievasmahtton diibmu 17.00 "Čálli lea Giehtaruohttasa bálgosa osolaš".