Yle Sámi mánáidprográmma Unna Junná álggaha dán čavčča prográmmaid dál sotnabeaivve 11.9.2016.
Unna Junná dán čavčča musihkka- ja stoahkanbottut leat golmma sámegillii ja dollet sisttis sihke leu’dd, livđe, luođi ja lávlagiid. Musihkka- ja stoahkanbottuid jođihit davvisámegillii Anna Näkkäläjärvi-Länsman , nuortalašgillii Anna Lumisalmi ja anárašgillii Heli Aikio .
- Buohkain sis lea nana musihkkaduogáš, muitala Yle Sápmi dieđáhusastis.
Stoahkanveahkkin leat mánát Anáris ja Čeavetjávrris ja čuojaheame Janne Lappalainen ja Nicholas Francett davvisáme- ja nuortalašgielat musihkkabottuin.
- Unna Junnás oaidnit maid eará miellagiddevaš ja gelddolaš bottuid, nugomat háhppilis Kumbepasi-beatnaga ođđa fearániid. Mielde lea maid Unna Junná ja son oahpásmuvvá dán háve rásiide. Heli Huovinen ja Terhi Harju buđaldanbottuin sáhttá oažžut somás tipsaid, muitala Yle Sápmi dieđáhusastis.
Unna Junná čavččas jotket prográmmajođiheaddjit Heli Huovinen, Irene Länsman ja mannán giđđabajis oahpisin šaddan Sara Wesslin ja Niki Rasmus .
Unna Junná -prográmma sáddejuvvo sotnabeaivvet diibmu 07.45 Yle TV2 -kanálas ja nuppádis seammá beaivve diibmu 08.15 Yle Fem -kanálas.