Sámi Árvvut -searvi lea juohkán vuosttáš bálkkašumi árbevirolaš dieđus. Bálkkašumi geigendilálašvuohta dollojuvvui Suoločielggis dán vahkus. Eanodaga Giehtaruohttásis bajásšaddan Lea Magga, Jovnnas-Jovnna-Elle, lei giitevaš gudnis erenomážit dan dihte go bálkkašupmi bođii sápmelaččain. Vuođustussan lei ahte Maggat ieža ealliba sámi kultuvrra, árvvuid ja árbevieruid mielde. Sámi Árvvut –searvi cealká ahte soai leaba nagodan doalahit árbevieruid maiddái garra áiggiid čađa ja lunddolaččat sirdán daid buolvvas bulvii. Searvvi beales bálkkašumi ledje juohkime Petra Biret Magga-Vars, Lemet Näkkäläjärvi ja Tauno Haltta.
