Vuođđoláhkaváljagotti Anára Sajosis disdaga ordnen ságastallandilálašvuođas searvvit besse muitalit oainnuideaset sámeássiin.Vuođđoláhkaváljagotti ságadoalli Annika Lapintie mieđihii ságastallandilálašvuođa maŋŋel, ahte ságastallamis ovdanboahtán áššit leat váddásat.
- Dákkár dilálašvuhtii lei dárbu ja lei buorre, ahte dat ordnejuvvui. Olbmot besse muitalit iežas vásáhusain. Áššit mat bohte ovdan leat dehálaččat ja váddásat dego sápmelašmeroštallan ja ILO 169 -soahpamuš, maid gieđahallan lea dál gaskan, muhto mat muhtin muttus bohtet vuođđoláhkaváljagotti gieđahallamii. Dáppe ledje sierra searvvit main ledje sierralágan oainnut dain áššiin, muhto nuhan dat lea riikkabeivviinge, ahte leat sierramielalašvuođat ja áššit galget goitge čovdojuvvot, oaivvildii Lapintie LK Ságaide.
Ságastallandilálašvuođas dollon sáhkavuoruin loktane ovdan ee. sápmelašmeroštallan, anársápmelaččaid riektesajádat ja árbevirolaš sámeealáhusaid suodji. Lapintie muitala, ahte vuođđoláhkaváljagotti ulbmilin lea gullat maid láhkaevttohusaid gieđahallama oktavuođas sierra oassebeliid nu dássebealálaččat go vejolaš, vaikko vuođđoláhkaváljagotti váldobargun lea geassit ráji, ahte leago láhka vuođđolága vuostá vai ii.
Maŋemus dálá vuođđoláhka-váljagotti beavddi nalde lean sámiide mearkkašahtti láhkaevttohus lei meahciráđđehusláhka. Das vuođđoláhkaváljagoddi ávžžuhii, ahte sámeparagráfat galget lasihuvvot láhkii, muhto ii njuolga dadjan, ahte láhkaevttohus livččii vuođđolága vuostá ilmmá sámeparagráfaid.
- Oalle dávjá dán ii goitge sáhte njuolga dadjat, ahte láhkaevttohus lea vuođđolága vuostá. Dalle vuođđoláhkaváljagoddi fal evttoha sierraváljagottiide rievdadusaid. Meahciráđđehuslága buohta čuolmman lea dat, ahte go Suopma ii leat vel ratifiseren ILO 169 -soahpamuša, nu danin ii sáhttán njuolga dadjat, ahte láhkaevttohus livččii vuođđolága vuostá.
Sámedikki ovdalaš ságadoalli Pekka Aikio ovddastii dilálašvuođas Suoma Boazosámit -searvvi. Son buvttii sáhkavuorustis ovdan, ahte lei mielde válmmaštallame ILO 169 -soahpamuša 1980-logus.
- Ii boahtán dalle millii, ahte Suopma ii oaččo áigái ratifiseret ILO-soahpamuša, dajai Aikio.
Aikio kritiserii sáhkavuorustis vuođđoláhkaváljagotti dálá doaibmavugiid. Su oainnu mielde vuođđoláhkaváljagoddi lea juristtaid ja dutkiid sajis álgán gullat politihkkejeddjiid oainnuid.
Aikio cuiggodii sáhkavuorustis maid alimus hálddahusrievtti mannan čavčča mearrádusaid ja dulkonlinjjá.
- Juos dát dulkonlinjá bisso, nu mis boahtá leat sámiid kulturiešmearridanorgána sajis ođđa "Davvi-Lappi lihtu", mii ovddasta sámiid lassin earáidge davviguovllu olbmuid.