Sámeleavgga ja Walesa leavgga buktin Eurovišuvnnaid lávlungilvvuide Stockholmii lea lobálaš, muitaluvvo Eurovišuvnnaid Facebook-siiddus. Lágideaddjit leat muđuige mearridan ložžet leavgapolitihka. Áššis muitalii vuosttažin Yle Sápmi.
- Eurovišuvnnaid lágideaddjit leat soahpan suokkardallama ja konstruktiiva ságastallamiid maŋŋel máŋgga oassálastiriikka delegašuvnnaiguin, ahte leavgapolitihkka ložžejuvvo. Oassálastiid našunála, guovllu dási ja báikkálaš leavggat leat lobálaččat ja dat mearrádus guoská maid Walesa leavgga (go akta Stuorra-Británnia lávluin lea Walesas) ja sámeleavgga (go Norgga lávlus leat álgoálggus sámi máttut), EBU Twitter-konttos ja Eurovision Song Contest Facebook-siiddus muitaluvvo.
Ságastallan leavggain álggii earret eará das, go Norgga eurovišuvdnaovddasteaddji Agnete Johnsen lea sápmelaš, muhto su guottiheaddjit eai livčče álgoálgosaš njuolggadusaid jelgii sáhttán buktit sámeleavggaid Eurovišuvnnaide Stockholmii.
Eurovišuvnnaid njuolggadusaid jelgii gehččiin eai oaččole leat mielde go oassálastiriikkaid leavggat dehe ON dievas lahttoriikkaid leavggat. Sámi váikkuheaddjit Norggas ja Ruoŧas cuiggode garrasit Eurovišuvnnaid álgoálgosaš leavgapolitihka.
Johnsen lea eret Vuonnabađas ja son oassálastá gilvvuide šuoŋain Iceabreaker. Eurovišuvnnaid finála lea miessemánu 14. beaivve Stockholmmas, Ruoŧas.