Sámedikki II várreságadoallin válljejuvvon Tuomas Aslak Juusoi bázii buorre dovdu vuosttas sámediggečoakkámis.
- Mii leat nagodan čađahit dan doaibmaválddi ja iešmearrideami dainna lágiin, ahte mii leat organiseren iežamet. Demokráhtalaš ásahusain lea álo ságastallan ja obanassii dat lea ájanis doaibma. Lean ilus, ahte eandalii nuppi čoahkkinbeaivve mii bastiimet hui bures ovttasbargat.
Juuso jáhkká, ahte sámediggi ferte árvvoštallat dievasčoakkáma meannudanvuogi.
- Guovtti beaivvi ollesčoahkkin attálii buoret vejolašvuođa hukset dakkár ságastallanforuma. Mii eat ovtta beaivvi čoahkkimiin nagot hukset ovttasbarggu. Evttohusat, mat bohtet dievasčoahkkimii livčče eambbo konkrehtalaččat, go daid birra leat ovddalgihtii joavkkuiguin hubmojuvvon. Mii sáhtáleimmet de buorebut linnjet ja geavahit dan ollesčoahkkima nu, ahte doppe livčče čielga mearrádusat válmmašin.
Juuso mielas guovttebeaivásaš dievasčoakkán attálii liibba čiekŋut áššiide buorebut.
- Vuosttas beaivve álggahit čoahkkima, botket dan vehá árabut ja lágidit eahkedis eahpevirggálaš oasi sámediggeáirasiidda, mas sii besset ságastallat ja gullat áššedovdiid. Lea jurdda demokráhtalaš ásahusain, ahte politihkalaš áššit fertejit gulahallot ja diekko bokte gávdnat dan konsensusa. Dán ollašuhttin lea dieđusge ruđalaš resurssain gitta.
Juuso mielas vuosttas stuorra hástalus stivrra barggus leat doaibmaprográmma vuoruheamit.
- Dat lea demokratiijjas hui lunddolaš, ahte siviilasearvvuš maid livčče váikkuheame dakkár áššiide. Njeallje jagi lea oanehis áigi, juos mii geahččat Suoma ráđđehusbaji ja jos mii hálidit dan áigge oažžut áššiid ovddosguvlui, nu mii fertet oažžut iežamet prosessaid johtui jo dál.
ON doaimmain mielde leamašan Juuso deattuha ON álgoálbmogiid rivttiid julggaštusa mearkašumi maid sámedikki barggus ovttas stáhtain.
- Suopma lea čatnasan duohtandahkat ON álgoálbmotjulggastusa. Dat lea juoga man Suopma lea ieš hálidan dahkat.