Sámediggi gieđahalai bearjadaga dollon dievasčoakkámis doaibmaprográmma sisdoalu.
Sámedikki áirras Jouni Aikio (Haikonen) evttohii bearjadaga dievasčoakkámis sámedikki doaibmaprográmmii lasihuvvot, ahte sámediggi válljelii ođđa válgalávdegotti ja bijalii válgalávdegotti doaimma johtui jo ovdal dán jagi loahpa. Sivvan dasa Aikio namuha, ahte válgalávdegoddái bohtet olu válgalogahallamii guoskevaš ohcamušat, maid gieđahallan dagaha olu barggu.
- Válgalávdegottis lea nu olu bargu, ahte dat geargá dusse bargat dan hohpolaš ja bákkolaš áššiid, muhto eará dehálaš áššiide ii leat áigi. Dasa lassin, ahte válgalogahallamii guoskevaš ohcamušat leat olu, nu okta ohcamuš sáhttá leat máŋgalogi siiddu guhkki, man gieđahallan dagaha olu barggu, muitalii Aikio bearjadaga dievasčoakkámis.
Aikio deattuhii, ahte barggu válggaid plánema ja ovddideami ovdii galggalii geargat bargojuvvot ovdal aitosaš válgalogahallamii guoskevaš ohcamušaid gieđahallama. Stivrra evttohusas doaibmaprográmman lohká, ahte válgalávdegotti galgá válljejuvvot ovdal jagi 2019 álggi, mii lea Aikio mielas ila maŋŋit.
- Lea vuordimis ahte čuovvovaš válggaid áigge ohcamušat sáhttet leat duppalmeari, go veardidan vássán válggaide, lasihii son.
Sámediggi dohkkehii Aikio evttohusa doaibmaprogrammii. Sámedikki válgabaji politihkalaš deattuhusat ja guovddáš boađusulbmilat leat čoggojuvvon jagiid 2016–2019 doaibmaprográmmii ja ekonomiijaplánii, maid sisdoalus ságastallojuvvoje ja mearride bearjadaga.
Dievasčoakkán streamejuvvui ja čoakkán lei vel gaskan diibmu 15.34.
Sáhka lea dievasmahttojuvvon diibmu 16.32: Sámediggi dohkkehii Aikio evttohusa doaibmaprográmmii.
