Johtti Sápmelaččat -searvi mearridii duorastaga dollon čoakkámisttis, ahte searvi ii lágit Suoma boazocup-oassegilvvu Heahtás giđđat 2016. Váldosivvan dasa lea Suoma heargegilvováljagotti čakčat bargan mearrádus, ahte olgoriikkalaš hearggit eai sáhte oassálastit Anára heargegonagasgilvvuid gonagasluohkái.
- Johtti Sápmelaččat -searvi ii dohkket dan, ahte dušše Suoma beale hearggit sáhttet oassálastit gonagasluohkái. Mis lea leamašan ulbmilin, ahte maid Norgga- ja Ruoŧa beal hearggit sáhttet čoaggit čuoggáid gonagasluohká várás. Heargegilvosearvvuš lea juo muđuige nu unni, ahte eat sáhtte dohkkehit heargegilvováljagotti meannudeami áššis, muitala Johtti Sápmelaččat rs. ságadoalli Samuli Näkkälä .
Näkkälä muitala goitge, ahte Heahtá Márjjábeivviid oktavuođas lágiduvvojit heargevuodjima World Cup -oassegilvvut, dego diibmáge.
- Dáidda gilvvuide sáhttet buot riikkaid gilvohearggit oassálastit, deattuha Näkkälä.
Heargegilvováljagoddi dohkkehii čakčat 2015 ođđa gilvonjuolggadusaid. Gilvonnjuolggadusaid jelgii heargegonagasgilvvuid gonagasluohkkái ožžot searvat dusse suopmelaš bahkka luohkás dárbahassii čuoggáid čoaggan hearggit. Mannan jagi gonagasluohkkái sáhtte searvat maid olgoriikkalaš hearggit.
Bálgosiid ovttastumi stivra mearridii geasset 2015 sirdit mearridanválddi heargegilvoáššiin ollásit heargegilvováljagoddái.