Suoma sámediggi doallá ihttin dán válgabaji rahpančoakkáma. Čoakkámis válljejuvvojit sihke sámedikki ságadoalli, stivralahtut ja lahtut lávdegottiide. Ságadoallibáikkis leat beroštuvvan sihke Yle Sámi ja Lapin Kansa dieđuid mielde goit Anu Avaskari , Veikko Feodoroff , Tuomas Aslak Juuso , Kari Kyrö , Pentti Pieski ja Tiina Sanila-Aikio . Sámedikki dievasčoakkán vállje loahpalaččat ságadoalli.
Lapin Kansa suomagielat ságas (LK 22.02.2016) muitaluvvui, ahte dábálaččat válgavuoitis lea boahtán sámedikki ságadoalli. LK Ságat lea guorahallan ášši ja gávdnan, ahte Suoma sámedikki áigge ii oktiige leat válggaid jietnahárábis dehege das gii lea ožžon eanemusat jienaid sámediggeválggain boahtán sámedikki ságadoalli.
Vuosttas Suoma sámediggeválggat dollojuvvoje jagis 1995. Dan ovdal doaimmai jagi 1973 rájes ásahusa vuođul Sámi parlameanta.
Jagi 1995 sámediggeválggaid jietnahárát lei Raimo Gauriloff Anáris, gii oaččui válggain 131 jiena. Ságadoallin dan válgabajis válljejuvvui Pekka Aikio Vuohčus, gii oaččui válggain 52 jiena.
Jagi 1999 sámediggeválggaid jietnahárát lei Pekka Fofonoff Anáris, gii oaččui 167 jiena. Ságadoallin dan válgabajis válljejuvvui Pekka Aikio Vuohčus, gii oaččui válggain 87 jiena.
Jagi 2003 sámediggeválggaid jietnahárát lei Nilla Tapiola Ohcejogas, gii oaččui 152 jiena. Ságadoallin dan válgabajis válljejuvvui Pekka Aikio Vuohčus, gii oaččui válggain 83 jiena.
Jagi 2007 sámediggeválggaid jietnahárát lei Erkki Lumisalmi Anáris, gii oaččui 165 jiena. Ságadoallin dan válgabajis válljejuvvui Klemetti Näkkäläjärvi Eanodagas, gii oaččui válggain 78 jiena.
Jagi 2011 sámediggeválggaid jietnahárát lei Tiina Sanila-Aikio Anáris, gii oaččui 148 jiena. Ságadoallin dan válgabajis válljejuvvui Klemetti Näkkäläjärvi Eanodagas, gii oaččui válggain nubbin eanemus jienaid, 142.
Gáldun: Lapin Kansa arkiivaságat jagis 1995-2012