Neeta Jääskö , gii čohkká vuosttaš baji dál sámedikkis, anii mannan disdaga dollon sámedikki vuosttas čoakkánbeaivvi lossadin. Jääskö mielas eandalii stivrra válljen lei váttis.
- Bođii nággu ahte mo mii válljet stivrra ja maid guovlluid mielde ja mo mii ollašuhttit dásseárvvu. Dat lea bargoortnegis meroštallon, muhto ii doarvái dárkilit. Das manai olles beaivi. Dat lei oalle heajos dilli, go fuobmái, ahte olbmot álge eddot dasa maid vásihit. Seamma ákkat ja argumeanttat álge boahtit ođđasit ja ođđasit. Oalle olu dain váidalusain lei taktikeren, čoahkkima ájiheapmi ja ovttasbarggu sehken. Mii eat ovdánan gosage, muitala Jääskö.
Jääskö mielas rahpančoakkáma nubbi beaivi manai buorebut.
- Dat manai mu mielas bures go gearggaimet stivrraválljejumiin. Devddiimet lávdegottiid ja gávnnaimet daidda maid anárašgielat ovddasteddjiid. Livččen hálidan, ahte mii livččiimet geargan ovtta beaivvis, muhto gusto dat galggai mannat ná.
Jääskö muitala, ahte sámediggelahtuin lei dakkár ságastallan, ahte sii galggale beassat doallat guovttebeaivásaš ollesčoakkámiid, gos buohkat leat čoahkis.
- Mis lei vuosttas geardde olles sámediggi čoahkis. Orui ahte lei sáhka olbmuid gaskavuođain ja muhtimat eai gulahallan. Mis livčče buorre leat muhtin dákkár oahpásmuvvanboddu ovdal čoahkkima, earáge dan ovddet beaivve seminára.
Anárašgielat Jääskö muitala, ahte stivrra válljema maŋŋel sutnje bázii imaštuhtti dovdu.
- Lean duhtavaš dálá stivrii ja jáhkán ahte dat bastá bargat olles sámi ovdii ja jáhkán, ahte mun beasan váikkuhit maid dábálaš áirrasin. Muhto lei imaš ahte olles beaivvi lei hállojuvvon, ahte stivrras galggašii leat anáraš ovddasteaddji. Maŋemus jienasteapmi manai mu ja Magreta Sara gaskas. Dalle livčče leamašan 1000 dálera vejolašvuohta válljet anáraš ovddasteaddji, gii áibbas vissásit geavaha ja ovddida anárašgiela, muhto das ii vissa de leange sáhka anárašvuođas.