Etnorock-joavku Irdon bálkkašuvvui ruvssuiguin vuosttaš skearru almmustahtinkonsearta maŋŋel. Dat dollojuvvui City-Sámit rs. álbmotbeaivedáhpáhusas Teáhter Forumis.
- Gal mun ledjen nu gealdagasas ovdal dán konseartta, muhto dál mun lean nu duđavaš go dál mii beasaimet čuojahit álbmogii buot min bihtáid, muitalii Sápmiklubbas guldaleddjiide lávlu Anni Guttorm .
Irdona vuosttaš single "Máddariid lávlla" almmustuvai 17.4.2015. Debyhttaskearru guoddá seamma nama.
Irdon čuojaheddjiin lei hohpolaš vahkuloahppa go joavkku lahtuin oassi čuojahii Oslos Ailu Vallein beaivvi ovdal álbmotbeaivvi.
- Oslos lei konseartaklubba measta dievva ja doppe lei buorre atmosfeara, muitalii Oula Guttorm Sápmiklubbas guldaleddjiide.
- Gal dás guovtti konseartta gaskas measta diimmu gearggai nohkatge, leaikkastalai Juho Kiviniemi.