Sápmelaš etnorock-joavku Irdon almmustahttá debyhtaskearrus sámi álbmotbeaivve 6.2.2016 Helssegis.
Irdonis čuojahit njeallje Suoma Sámi musihkkara: lávlu Anni Guttorm , gitárra/lávlu/juoigan Oula Guttorm , bássa/lávlu Juho Kiviniemi ja trumbbut Patrik Fält . Joavku lea vuođđuduvvon Anáris.
Irdona davvisámegielat musihkas ovttastuvvet etno, luohti, heavymusihkka ja sinfoniijalaš elemeanttat. Namma boahtá Suoma davimus duottarguovllus.
- Doppe lea Irdonoaivi-nammasaš duottar ja dan guoras smávva jávri, Irdonjávri. Dat lea hui guorba guovlu, gos mihkkige ii šatta. Duottarbiekkat ja roavva luondu gullo maiddái min musihkas, mas ovttastuvvet etno, luohti, heavymusihkka ja sinfoniijalaš elemeanttat.
- Lyrihkain vuhttojit dološ sámi mytologiijat ja nuppe dáfus modearna fáttát nugo gávpotluvvan sápmelašvuohta ja deanusápmelaš kultuvra, mii lea vehážiid mielde jávkamin. Dehálaš temá lea, mo seailluhit árbevirolaš kultuvra, muhto seamma áigge čuovvut áiggi ja ovdánit, joavku govvida musihkas.
Irdona vuosttaš single "Máddariid lávlla" almmustuvai cuoŋománu 17. beaivve 2015. Vuosttas skearru guoddá seamma nama. Skearru almmustahttinkonsearta dollojuvvo City-Sámit-searvvi álbmotbeaivedáhpáhusas Teatteri Forumis lávvardaga guovvamánu 6. beaivve 2016.