Ima hutkosat -mánáidskearru lávlagiin lea dál válbmanan DVD, mii sisttisdoallá buot 12 lávlagis dahkkon sierra musihkkavideo.
- Dáidá leat vuosttas geardi Sámi máilmmis, go ovtta skearru buot lávlagiin leat maid musihkkavideo, musihkkavideoid bagadallan Inger-Mari Aikio dehege Ima Aikio muitala dieđáhusas.
Videot leat unná muitalusažat, mat leat govvejuvvon Buolbmatjávrris, Ohcejogas ja Anáris. Dain lávluba ja čájáhallaba Niillas Holmberg ja Hildá Länsman . BBB-nammasaš bihtás čájáhallaba maid mánáguovttos Elenna Pieski ja Inga Elisa Ravna-Pieski .
Musihkkavideoid vuođđun lea Ima hutkosat -CD, mas leat 12 mánáidlávlaga sámegillii.
- Mánáide dahkkon sámegiel musihkkavideot leat hirbmat uhcán. Danin 12 ođđa video lasihit dovdomassii sámegielat mánáid vejolašvuođa návddašit musihkas maid visuálalaččat. Dat doibmet maid buorre oahppomateriálan sámegiela lohkkiide – mánáide ja ollesolbmuidege, muitala Ima Aikio.
Buvttadeaddjit Ima Aikio ja Joonas Saari deattuheaba, ahte maid sámi mánáidkultuvra eallá dán áiggis, mas mánáid árgabeaivái gullet videot. Musihkkavideoiguin soai hálideaba juohkit positiivva gova sámi kultuvrras.
- Musihkkavideot muitalit omd. mo sáhttá geavvat, jus menddo sakka vuodju dihtorspealuid máilbmái dahje jus háliida oppa áigge eambbo ah eambbo duhkorasaid. Muhtin videoin ohcat Niillasa láhppon seaibbi dahje guorrat ruoná luottaid. Imaštat maid mii dáhpáhuvvá, go Niillas gávdná stálu vuoimmi stáloburssas, muitala Ima Aikio.
Sámediggi juohká Ima hutkosat -DVD skuvllaide, mánáidgárddiide, giellabesiide ja girjerájuide nuvttá. Roope Mäenpää lea dahkan Ima hutkosat -CD lávlagiin nuohtaid, maid sáhttá fidnet sámedikki skuvlen- ja oahppamateriáladoaimmahagas.
Musihkkavideoid leamašan dahkamin buvttadeaddjiguoktá lassin Kevin Francett, Jonne Järvinen, Mikkâl Morottaja, Elmeri Härkönen, Susanna Rauno, Vilma Rautakangas, Miikka Miinala, Sunna Kitti, Nicholas Francett, Reetta ja Pietu Jaakonaho ja Pekka Sammallahti .
DVD leat buvttadan Ima filbma- ja sátneduodji ja Inarin Elokuvateollisuus Oy. Videot čájehuvvojit Skábmagovat -filbmafestiválas ođđajagimánus Anáris. DVD lea fargga vuovdimassii omd. Sámi duojis ja Siiddas.