Ijahis idja -festivála oktavuođas Anára Sámemusea Siida lágida lávvordaga diibmu 11–13 musihkkaseminára. Seminára fáddán leat ođđa, nuorra sámeartisttat, geat ovttastahttet sámi musihkkaárbevieru ja musihka ođđasamos stiillaid iežasetlágan musihkkan. Semináras dollet sáhkavuoruid earret eará Ágy, Ylva ja Ravggon.
Ágy lea sápmelaš eletropop-artista. Jagis 2015 Ágy almmustahtii vuosttas EP Arvedávgi, man nammabihttá gorgŋii NRK P3 nuoraid kanála čuojahanlistui. Ágy muitala sáhkavuorustis iežas musihkas ja das, mii movttáskahttá su artistan.
Elektronalaš musihka čuojaheaddji Ylva-joavkku vuosttas skearru YLVA almmustuvai miessemanus 2016. Joavkku ovdaolmmoš sámedáiddár Niillas Holmberg muitala semináras Ylva-joavkku musihkalaš duogážis ja luođi ja divttaid laktimis elektronalaš ritmmaide.
Seminára loahpaha vuohččulaš folk-rock Ravggon. Seminárii joavkkus oassálastet Milla Pulska , Matti Naakka ja Panu Klemettilä . Ravggon almmustahtii vuosttas skearrus Ráji ravddas suoidnemánu álggus. Sáhkavuorusteaset sii muitalit iežaset musihkas ja lyrihkain, mat gieđahallet dálá máilmmi ihtagiid, muhto vuođđuduvvet goitge iežas ruohttasiidda ja lundui.
Seminára álggahit Sámi oahpahusguovddáža musihkkaskuvlejumi oahppit, geat muitalit vásáhusaideaset birra skuvlejumis ja boahttevuođa plánain musihka olis.