Golbmanuppelogát geardde lágiduvvon Ijahis idja –álgoálbmogiid musihkkafestivála guossemearri lassánii mannan jagi ektui. Mannan vahkuloahpa lágiduvvon dáhpáhus čohkkii Anárii aktiibuot sullii 3300 festiválaguossi.
Dáhpáhusas ledje vuosttaš geardde konsearttat olgolávddis sihke bearjadat- ja lávvardateahkeda. Dán jagáš festiválain ledje maid sámi valáštallangilvvut.
- Goabbáge eahket lei hui bivnnut, vaikke lávvardaga leige veháš arvedálki. Dasa lassin Sajosa auditoria dáhpáhusat; teáhter bearjadaga ja skearroalmmustahttinkonsearttat lávvardaga čohkkejedje sále dievva olbmuid. Maiddái mánáid- ja nuoraidbeaivvis ledje eanet oassálastit go ovdal, muitala festivála buvttadeaddji Oula Guttorm .
Ijahis ija olgokonsearttaid ja Yle Sápmi -arena lei vejolaš čuovvut Sámi oahpahusguovddáža medialinnjá lágidan neahttasáddaga bokte.
- Neahttasáddagat leatge šaddan eanet ja eanet bivnnuhat juohke jagi. Ijahis ija –livestream sáddagiid čuvvo badjel 3000 geahčči birra máilmmi, muitala Guttorm.
Festiválas loaiddastedje dán jagi ee. Sofia Jannok , Ylva, Ánnámáret Ensemble, Ulla Pirttijärvi & Ulda ja Felgen Orkester.
Ijahis ija lágidit ovttasbarggus Anára Sámisearvi rs, Sámediggi, Sámi oahpahusguovddáš, Anára gielda, Dáidaga ovddidanguovddáža Lappi doaibmasadji, Sámemusea Siida, Yle Sápmi ja Hotealla Kultahovi.