Ijahis idja -festivála muitala, ahte dán jagáš festiválii vuvdet váhkoloahpa festiválapássaid ja beaivvebileahtaid. Ijahis idja -festivála dollojuvvo Anáris 19.-20.08.2016.
- Festiválapássain beassá buot prográmmas máinnašuvvon dáhpáhusaide earet Sámemusea Siidda musihkkaseminárii. Festiválapássa máksá ovddalgihtii 50€ ja uvssas 60€. 4-12-jahkásaččaid pássaid haddi lea ovddalgihtii 30€ ja uvssas 40€. Vuollel 4-jahkásaččat besset nuvttá sisa, muitala Ijahis idja dieđáhusastis.
Dáhpáhussii vuvdet maiddái beaivvebileahtaid sihke bearjadahkii (19.8.) ja lávvardahkii (20.8.). Beaivvebileahtta haddi lea ovddalgihtii 27€ ja uvssas 35€. 4-12-jahkásaččaid bileahtaid haddi lea ovddalgihtii 17€ ja uvssas 25€.
Ijahis idja muitala dieđáhusastis, ahte ođasmuvvon festiválas lea máŋggabealat prográmma.
- Konseartat leat olgun, Sámekulturguovddáš Sajosa šiljus, sihke bearjadaga ja lávvardaga. Dán lassin prográmmii gullet maiddai teáhterčájálmas, musihkkaseminára ja mánáid ja nuoraid beaivi. Áibbas ođđa oassin prográmmas leat sámi falástallangilvvut, main olbmot besset gilvalit bearjadaga ja lávvardaga ja Yle Sápmi Arena, ságastallanpanela, mii ordnejuvvo festiválalávddis ja man buvttada Yle Sápmi.
- Musihkka bealde gávdno sihkkarit juoidá juohkehažžii, go lávddi ala njuikestit earet eará Sofia Jannok , Johan Anders Baer & Dronefolk, Ulla Pirttijärvi & Ulda, Ylva ja Amoc, muitala Ijahis idja -dieđáhusastis.