Sámedikki ođđa áirras Aslak Holmberg cokkai gávtti jorgguládje sámedikki rahpančoakkáma álggus disdaga protesterendihte alimus hálddahusrievtti (AHR) doaimmaid sámeáššiin.
- Mun dieđusge hálidin čájehit vuostehágu dasa mo Suoma stáhta AHR lea váldán dan sajádaga, ahte sii galget leat dat alimus mearridanorgána sámiid ektui ja sápmelaččaid dovdamis. Lea absurda ášši, ahte olbmot geain ii várra leat mangelágán sámekultuvrra dovdamuš galggašedje beassat meroštallat sápmelašvuođa, muitala Holmberg.
Holmberg buvttii ovdan čoakkáma álggus sáhkavuorustis, ahte sámedikki čoakkán lea lágahis, danin go válggaid bohtosii váikkuhe AHR mearrádusat. Holmberg proteasta lei oaivvilduvvon čoakkáma álgui ja son jorgaliige gávtti rivttesguvlui ságadoalli válljema maŋŋel.
- Hálidin, ahte das ii boađášii muhtin boasttoáddejupmi ja dakkár govva ahte livččen dan vuostálastime. Mun ieš dorjon Tiina Sanila-Aikio ságadoallin.
Sámedikki rahpančoakkáma rabai Kari Kyrö , gii lea ieš dohkkehuvvon sámedikki válgalogahallamii AHR mearrádusain jagis 2011.
- Lea hui čalbmái čuohcci vuohki mo AHR mearrádusat lea váikkuhan min doibmii, mo sámedikki badji vulggii johtui. Hálidin dasa maid giddet fuomášumi.
Holmberg mielas AHR mearrádusat lea ášši, mii boahtá čuovvut sámedikki doaimmain maid dánge válgabaji áigge. Holmberg sávvá goitge, ahte ášši ii doalvvu nu olu fuomášumi go mannan válgabajis.
- Sápmelašmeroštallanášši ii leat eahpečielggas sámiid gaskas. Lea vejolaš, ahte davviriikkalaš sámesoahpamuša bokte mii gávnnašeimmet čovdosa, ahte livčče buot davviriikkain seammá dat meroštallan.
Juridihkalaš áššedovdit leat evttohan maid sierraduopmostuolu vuođđedeami, mii čoavddalii váidálusaid AHR sajis.
- In ane sierraduopmostuolu fuotnin nu guhká go leat sámi olbmot mat dahket doppe mearrádusaid, muhto in sáhte dohkkehit, ahte láttiin livčče dat váldi doppe, dadjá Holmberg.
Holmberg muitala, ahte son lea bajidan meroštallanášši maid Ovttastuvvan našuvnnaid (ON) álgoálbmogiid bissovaš forumas. Holmberg mielas lea buorre bajidit ášši riikkaidgaskasaččat go dat váikkuha maid Suoma beaggimii.
- Muhto ideála dássi livčče gal ahte mii eat dárbbašivčče riikkaidgaskasaččat bajidit dan baicce basttášeimmet stáhtain gulahallat dán áššis, muhto dál lea dan mađe váttis dilli, ahte in jáhke ahte dat lea vejolaš.
Suopma lea viggame ON olmmošriekteráđi lahttun badjái 2022-2024.
- Ii orošii buorre, ahte Suopma livčče mearrideame doppe, go Suopma rihkku eamiálbmogiid vuoigatvuođaid julggaštusa.