Suoma Álbmotgirjerájus lea almmustahttán ođđa sámegielat materiálaid neahtas. Áššis muitalii vuosttažin Yle Sápmi.
Álbmotgirjerádjosa Unnitlogugielaid digiterenprošeakta lea digiteren ja almmustahttán sámegielat materiálaid erenoamážit Jakob Fellmann čohkken Lapponica-čoakkáldagas.
Čoakkáldaga badjel 1300 oasis leat digiterejuvvon sámegillii deaddiluvvon dehe sámegiela sisttisdoalli oasit, aktiibuot 152 monográfa ja vihtta áigečállaga.
Lapponica-čoakkáldaga lassin Álbmotgirjerájus lea almmustahttán maid 11 monográfa, mat leat digiterejuvvon Ruošša Álbmotgirjerádjosa čoakkáldagain ja 14 Álbmotčoakkáldaga sámegielat čállosa.
Suoma Álbmotgirjerádjosis muitalit, ahte Lapponica-čoakkáldaga digiteremis lea stuora mearkkašupmi, dannego hupmit ja dutkit eai leat dán rádjái bastán geavtit dákkár materiála.
- Dát lea divrras čoakkáldat. Dat sisttisdoallá viidát materiála sámedutkamuša iešguđet surggiin. Materiálaid lea leamašan dán rádjai váigat ávkkástallat ja daid almmustahttin sihke ovddida sámegielaid dutkamuša ja doarju gielaid máŋggabealatvuođa, Álbmotgirjerájus dieđiha.
Unnitlogugielaid digiteren-prošeavttas lea ulbmilin buvttadit unnitlogugielain deaddiluvvon materiálaid gielladutkamuša ja álbmotdiehtaga doarjjan. Sohkagielaid digiteren lea Koneen Säätiö ruhtadan Kieliohjelma-prográmma oassefidnu.