Suoma ruoŧŧelaš álbmotbellodaga (RÁB) riikkabeaiáirras Anna-Maja Henriksson lea fuolas das mo evttohuvvon gearretriekteođastus váikkuha Suoma vehádagaid sajádahkii.
- Leago gearretriekteođastus oassin Vuođđosuopmelaččaid viggamušas duolbmut vehádagaid rivttiid? Mo ráđđehus áigu sihkkarastit, ahte ruoŧa- ja sámegielagiid gielalaš rievttit dorvvastuvvojit ođastusa maŋŋel, jearrá ovdalaš riekteminister Henrikson dieđáhusastis.
RÁB guđii ovddit bearjadaga čálalaš gažaldaga, mas earret eará gáibidit gearretriekteođastusa gielalaš váikkuhusaid árvvoštallama. Dasa lassin RÁB jearrá, mo ráđđehus áigu dorvvastit vuoigatvuođalaš bálvalusaid fidnema.
Riekte- ja bargominister Jari Lindström evttohii 11.2.2016 gearretrivttiid geahpedeami nu ahte dála 27 gearretrievtti sajis livčče 20 gearretrievtti. Earret eará Porvoo, Raasepori, Kokkola gearretrievttit sihke Soađegili kansliija heaittihuvvole.