He­lan­der Ci­ty-Sá­mit rs. sá­ga­doal­lin – Searvi hálida vuođđu­dit lasi bar­go­joavk­kuid

City-Sámit rs. válljii jahkečoakkámisttis ovttajienalaččat searvvi ođđa ságadoallin Hanna Helandera Avvilis. Maiddái searvvi stivrii bohte ođđa lahtut.

- Helander lea juo máŋga jagi áigge leamašan aktiivan City-Sámit searvvis. Helander bargá dutkin ja lea searvvis bargan earenomážit skuvlen- ja beaivedikšunáššiiguin. Helander válmmastallá dál nákkosgirjji Oulu universitehta Giellagas-instituhtas. Helander lea maiddái aktiivvalaččat ovdánahttán searvvi Máttábiegga-giellabeasi doaimma, muitala City-Sámit rs. dieđáhusastis.

Eará stivrra lahtut leat Jennika Alatorvinen , Mari Korpimäki , Petra Laiti , Inka Musta ja Heikki Mustonen . Várrelahttun válljejuvvui Outi Kangasniemi ja Elisa Sipakko .

- Lean ilolaš go mis leat stivrras mielde buot sámejoavkkut. Mielde leat guokte nuortalačča, golbma anáračča ja golbma davvisámi. Oassi boares stivrras joatká ain ja ođđa stivrra lahtuid bokte mii oažžut sihkkarit ođđa jurdagiid min doibmii, illuda Helander.

Searvi áigu ovddidit iežas doaimma dán jagi áigge nu, ahte sii leat ee. plánen váldit searvvi lahtuid eanet mielde plánet doaimmaid ja ollašuhttit doaibmajurdagiid.

- Mis lea juo ovdal leamašan hui doaimmalaš nuoraid joavku, muhto dál háliidivččiimet vuođđudit bargojoavkkuid maiddái ee. nuortalaččaide, anáraččaide ja ahkeolbmuide. Lassin mis sáhtášii leat bargojoavku, mii vástidivččii dáhpáhusaid ordnemis. Bargojoavkkuid bokte searvvi doaibma bálvalivččii buot buoremusat min lahtuid, muitala Helander.

Searvi áigu joatkit nuortalaččaid ja anáraččaid doaimmaid. Searvvis lea maid juo guhkit áiggi leamašan ulbmilin álggahit ahkeolbmuide iežaset doaimma. Lassin searvi joatká gávpotsámiid ovdduidgohcima ja luonddugaskavuođa nannejumi.

- Mis lea maiddái jođus stuorra fidnu, mas čielggadit, ahte livččiigo vejolaš vuođđudit sámekulturguovddáža Helssegii. Dál mii leat kártemin ovttasbargoguimmiid ja dillimolssaeavttuid, Helander muitala.