Geassemánu 27. beaivve lei fas márkan Čulloveaijoga gáttis Vuovdaguoikka eananguovlosearvvi lágidan luossagilvvus. Buohkanassii 53:s serve gilvalit ođđa fatnasis ja eará vuoittuin, maid lágideaddjit ledje dán jagi lihkostuvvan čoaggit oalle olu.
"Sámmálat dušše loktanedje duorggu mielde"
69-jahkásaš luossabivdi Heikki Tuovila rohttii stuorámus luosa Savvona luossagilvvus Badje-Deanus. Son lei gulul mannamin iežas “sihkkaris" dohppensadjái Vuovdaguikii, muhto ii áibbas geargan dohko go Sieiddejotnjálmmis stággu sojihii go stuorra luossa dohppii dolgevuggii.
- Álggahin suhkama gilvobáikki bokte ja de guokte diimmu maŋŋá, fártta badjel golbma rulla šnjirihii. Dohppii ja vuodjalii bajás, sealgge duohken njuikii, in diehtán álggos makkár guolli lea gitta. Goadjin vuojai viehka coahkásii ja sorai siimma guovtti geađgái, sámmálat dušše loktanedje duorggu mielde go gálgagohten dan geđggiin. Luossa lei bures gitta ja bessen joatkit gurrehallama ja roahkastit dan fatnasii, Heikki Tuovila muitala. Son buvttii luosa vihkkemii ja oaččui gullat deaddun 10,7 kilo.
- Mun jotken fas suhkama muhto ii dohppen šat eará go hárri, lohká Heikki, guhte lea searvan dáidda gilvvuide nuppelot geardde.
Dát luossa lei sutnje dán gease vuosttas suga, golgademiin ja fierpmis gal lea jo goddán luosaid áibba bures.
Tuovila lohká Savvona luossagilvvu somás gilvun.
- Lean muhtun muddui jo oahppan báikkiid, eandalii gilvobáikkis vulos ja dáppe leage miellagiddevaš oaggut go mielde leat dakkárat, geat dovdet dáid báikkiid hui bures, Heikki Tuovila láhttesta.
Son lei biillain fievrredan oaggunfatnasa gilvobáikái ja meinnii vuos doalvut vuoitofatnasa ruoktut eamida illun.
Olu bálkkašumit
Gilvvuide ledje dál ožžon olu bálkkašumiid ja maiddái ruhtabálkkašumiid vuoitofatnasii. Aarne Guttorm láidestii gilvvu ja lohká dán Savvona luossagilvvu gullat báikegotti geassái.
Vaikke gilvvu lágideapmi lea viehka rahčamuš smávva bargojoavkkuin de gullá báikegotti geassái.
- Dát lea šaddan árbevirolaš dáhpáhussan. Báršši gáttis lea álggahuvvon, Aarne Guttorm máinnaša.
Vuovdaguoikka eananguovlosearvi lea vuođđuduvvon jo 1960-logus ja álggos searvvi namman lei Ohcejoga eanadoallosearvi.
Tästä on kyse
Viisi lohta Outakosken lohensoudussa
Kesäkuun 27. päivänä pidetyssä Outakosken maaseutuseuran lohensoutukilpailussa oli 53 osallistujaa. Ylä-Tenolla 35. lohensoutukilpailussa saatiin keskivertoinen lohisaalis.
Yläkönkään isäntä Heikki Tuovila nappasi suurimman lohen ja sai nostaa trailerilleen uudenkarhean Tenonveneen. Tuovilan kojamo painoi vajaat 10,8 kiloa.
Moninkertainen Tenon lohikuningas Antti-Niiles Länsman kalasti tyttärenpoikansa Jarkon kanssa hopealla, 10,3-kiloisella lohella. Viisi venekuntaa sai saalista.