Sámedikki hálddahushoavdda virgái ohce mearreáiggis guovttis. Soai leaba servodatdiehtagiid magisttar Irma Toivonen Giemajávrris ja filosofiija magisttar Pia Ruotsala Anáris. Ruotsala doaibmá dál Sámedikki mearreáigásaš hálddahushoavdan.
Sámedikki stivra gieđahallá hálddahushoavdda virggi deavdima čuovvovaš čoakkámisttis. Loahpalaččat áššis mearrida dievasčoakkán, mii lea 21.12.2015.
Hálddahushoavdda bargun lea jođihit Sámedikki hálddahusa, ekonomiija ja bargoveaga. Lassin hálddahushoavda dahká duohtan Sámedikki mearrádusaid. Son maid pláne ja ovddida Sámedikki doaimmaid ja lea Sajosa hoavda.
Sámediggi dieđiha, ahte hálddahushoavdda virgi lea dán rádjai leamaš mearreáigásaš.
- Sámediggelága ođasmahttin livčče buktán hálddahushoavdda virgái nuppástusaid. Danin Sámediggi oinnii, ahte galgá vuordit vejolaš láhkaođastusa, ovdalgo deavdá virggi, muitala ságadoalli Tiina Sanila-Aikio.