Juovllat lahkonit ja máŋgasat liikojit ráhkkanit juovllaide. Sáhttá lávlut ja guldalit juovlalávlagiid, buđaldit juovlabuđaldusaid ja láibut. Oulu bismagotti sámebarggu čálli Erva Niittyvuopio mielde juovlaráhkkaneamit leat jo álgán. Son lea juo doallagoahtán giellabesiide juovlarohkosbottuid.
- Easkka fitnen Roavvenjárgga giellabeasis doallamin rohkosbottu ja čuovvovažžan manan Oulu mánáidgárdái, lohká Niittyvuopio.
Maŋimuš áiggiid sámebarggu deaddu leamaš mánáin ja nuorain.
- Dat lea dehálaš eandalii danin go nu olu mánát ásset sámeguovllu olggobealde, dadjá Niittyvuopio.
Son lohká ohcalit maid ovttasbarggu sámeoahpahusain ja sáhtašii lágidit sámeoahppiide maid juoga dilálašvuođa.
Hástala olbmuid fuomášit ođđa juovlalávlagiid
Bismagotti sámebargi háliida ođastit gihppaga boahttevuođas ja geahččala deaddilit ođđa gihppaga de moatti jagi geažes. Niittyvuopios lea sávaldat lávlagiid ektui.
- Dárbbašit dakkár juovlalávlagiid maid mii leat ieža hutkan ja čállán. Dakkárat mat eai leat jorgalusat. Hástalan olbmuid smiehttat dien guvlui, lohka Niittyvuopio.
Girku vátna sámegielat materiálat leat unnán ja daid ferte geavahit viidát ja máŋggaid jagiid. Oulu bismagoddi ja Suoma vuolggahusbargu leat ovttas buvttadan Čábbámus juovlalávlagat –gihppaga, mas leat golmma iešguđege gillii oahpes juovlalávlagat. Oassi lávlagiin leat seamma lávlagat iešguđege sámegillii. Ovdamearkan Na, leago boahtán geassi lea gihppagis anárašgillii Na, lii-uv šoddâm keesi ja nuortalašgillii Na, lij-ǥo puättam ǩieʹss.
Čábbáseamos juovlalávlagiid čoahkkanit lávlut sámeguovllus measta juohke sajis. Dušše Vuohčus lágiduvvon dán jagi dušše suomagillii. Lassin searvegottit lágidit guovttegielat juovlaipmilbálvalusaid, rohkosbottuid ja Ohcejogas lea leamaš vierrun doallat juovlaijameassu. Sámeguovllu olggobealde lágiduvvojit lávlundilálašvuođat stuorámus gávpogiin.
Lassin Oulu bismagotti sámebargu lea buvttadan Buđal juovlakruppá –gihppaga. Dan sáhttá tiŋgot beaiveruovttuide, giellabesiide ja skuvllaide muhto dat ii sáddejuvvo ovttaid mielde ovttaskasolbmuide.
Čábbámus juovlalávlagat ja juovlaáigi
Anáris
8.12. Anára searvegottedálus sámegielat čábbámus juovlalávlagat dii 18
9.12. Njellima ortodoksagirkus juovlalávlagat sáme- ja suomagillii dii 18
12.12. Avvila girku searvegottesáles sápmelaš ahkeolbmuid juovlaávvudeapmi dii 13
17.12. Leammis Gáppe-Jovnna báikkis juovlalávlagat sáme- ja suomagillii dii 12
17.12. Áŋŋelis Elle ja Eino Torikka geahčen juovlalávlagat sáme- ja suomagillii dii 17
Eanodagas
2.12. Heahtás hearvásbeaivi ja čábbámus juovlalávlagat searvegottedálus dii 10-13
24.12. Gárasavvonis juovlaruohta guovttegielat rohkosboddu dii 14
Ohcejogas
11.12. Ohcejoga girkus čábbámus juovlalávlagat dii 18
15.12. Pub Rastigaisa čábbámus juovlalávlagat dii 18
17.12. Njuorggáma rohkosviesus čábbámus juovlalávlagat dii 18
18.12. Gáregasnjárgga kapeallas čábbámus juovlalávlagat dii 18.00
24.12. Njuorggáma rohkosviesus juovlaruohta rohkos dii 13
24.12. Gáregasnjárgga kapeallas juovlaruohta rohkos dii 16
25.12. Ohcejoga girkus juovlabeaivvi ipmilbálvalus dii 9
26.12. Gáregasnjárgga kapeallas Stefanusa nuppi juovlabeaivvi meassu dii 11
Vuohčus
7.12. suomagielat čábbámus juovlalávlagat Vuotson majas dii 18
Sámeguovllu olggobealde
29.11. Oulus čábbámus juovlalávlagat Karjasilta girkus dii 18
14.12. Roavvenjárggas čábbámus juovlalávlagat Roavvenjárgga girkus dii 19
16.12. Helssegis čábbámus juovlalávlagat Lähetysgirkus dii 17.30