Sámedikki dievasčoakkán ságastalai ikte máŋga diimmu ođđa bargoortnega sisdoalus. Bargoortnegiin ásahuvvojit earret eará njuolggadusat sámedikki stivrra ja lávdegottiid čoakkádusain ja bargovugiin. Ievttá čoakkán álggii logi áigge iđđes, muhto fanai, go sámediggi jienastii stivrra evttohusaid ja dievasčoakkámis ovdanboahtán vuosteevttohusaid gaskas. Maid sierraoaivilat guđđojuvvojedje.
Dievasčoakkámis dahkkojuvvui earret eará evttohus, ahte bargoortnegii ásahuvvolii vejolašvuohta válljet stivrralahtuide várrelahtuid, muhto evttohus dáhpii jienastusas dálá vuogádahkii. Kulturmearreruđaid ohcan rievdá, dannego boahtteáiggis dušše kulturlávdegotti lahtut eai sáhte ohcat kulturdoarjagiid. Ođđa bargoortnet boahtá fápmui jagi 2016 álggus.
Sámedikki dievasčoakkán dohkkehii čoakkámis maid boahtte jagi bušeahta ja doaibmaplána. Doaibmaplána sisttisdoalai evttohusa nuortalašgielat digitála sátnegirjjis. Doaibmaplána dohkkeheami oktavuođas lei guhkes ságastallan álgagis davvisámegielat digitála sátnegirjji buvttadeamis. Ságastallama oktavuođas bođii ovdan, ahte sámedikkis lea heajos ruhtadilli ja ahte lea divrras buvttadit digitála sátnegirjjiid juohke golmma sámegilli.
Sámedikki dievasčoakkán válljii hálddahushoavdda virgái Pia Ruotsala . Virgái ohce áigemearis guovttis. Ruotsalas lei virgái gáibiduvvon sámegiela dáidu.
Streamejuvvon dievasčoakkán bisttii badjel diibmu gávcci rádjái eahkes.