Báđoš Rávná, Rauna Guttorm lea aiddo joavdan Ohcejohnjálmmis čoahkkimis ruoktot.
– Iđđes gehččen ahte dálkedieđáhus čájeha galbma beaivvi, de in heađástuddan doapmat ruoktot. Muhto dál oainnán dat leage dulvan das rájes juo 20 sentte.
Báđoš lea sullii 40 kilomehter geažes Ohcejohnjálmmis bajás, Gáregasnjárgga guvlui.
– Gergen justa gádjut šilju geassestuoluid, ovdal govddiidedje. Livčče mannan dieđe gosa, čaimmiha Rávdná.
Dálu lusa galgá johtit ádjaga rastá, muhto das ii šat beasa goike julggiiguin. Muhto dat ii hehtte su.
– Mus lea fanas ja dainna beasan lagabui biilla.
Dán jagi Deanu jieŋat oasil sudde ja vehá maid baldut golge.
– Ikte lei nu leigga beaivi ja eahkes dulvvai dás min buohta. Mu dállu bázii dego suolun, dohko njárgageahčái, čilge Rávná.
Su mielde ná dulvi ii leamaš guhkes áigái.
– Dáiddii 1996 leat dákkár dulvi maŋimuš.
Lassin Báđožis leat máŋggat geassebarttat. Daid lusa ii sáhte dál vuodjit, muhto vácci gal ain beassá.
– Oappá geassebáiki lea áibbas Báđošjoga gáttis. Fitnen geahččamin de čáhci ollá juo sávnni rádjai, dadjá Rávná.
Dál sáhttá dušše vuordit ja čuovvut man olu vel dulvá.
Jurdagat sus gal leat juo luossabivddus.
– Áiggon dás maŋŋá fitnat geahččamin iežan bivdosajiid.
Guttormin koti Tenon varrella jäi saarroksiin
- Rauna Guttormin talo jäi tulvan noustua saarroksiin Utsjoella, Báđošin kylässä.
- Tunturien sulavat lumet ryöppyävät Báđošjoessa vaahtona Tenoon.
- Guttorm kulkee veneellään lähemmäs autoa, jotta pääsee asioille kirkonkylälle.
- Báđoš sijaitsee noin 40 km Utsjoen kirkonkylältä Karigasniemeen päin.