Helssega sámi álbmotbeaivvedáhpáhusaid ordeme leamašan Mari Korpimäki ja City-Sámit rs. ságadoalli Pentti Pieski leigga guktot duđavaččat sámi álbmotbeaivvedoaluid maŋŋel. Helssegis ledje álbmotbeaivve mánáidriemut kulturguovddáš Caisas ja eahketdoalut Teáhter Forumis.
- Guktot doalut manne buorebut go ledjen vuordán. Mánáidriemuin ledjen vehá gealdagasas, go álggus ledje nu unnán olbmot, muhto dehan dat fáhkkestaga dievai olles báiki. Sápmelaččathan lávejit boahtit doaluide vehá maŋŋeleappos álo. Eahketdáhpáhusas ledjen hui duđavaš artisttaid loaiddasteami lassin maid boddoprográmmáide ja dasto citysápmelaččaid iežaset performansii, man namma lei Gávpogis lundui, muitala Korpimäki.
Nuortalaš Korpimäki lea ieš gráfalaš plánejeaddji ja bargá márkanfievrrideami oaivegávpotguovllu dáhpáhusaide. Son pláne dáhpáhusaid visuálalaš hámi, dego Sápmiklubbage.
- Mannan jagi lei juo Sápmiklubba ja dalle mii leimmet jo plánen visuálalaš hámi dán dáhpáhussii. Válmmas konseaptta nala lea álki bargat ođđa. Áidna váttisvuohta lei gávdnat buori saji gos bastá lágidit doaluid, muhto datge čoavdašuvai de áiggi mielde. Searvvi lahttu Keijo Nuorgam fuomášii dasto dán árbevirolaš biebmotema eahketdoaluide, muitala Korpimäki
Korpimäki vástidii sihke mánáid- ja eahketdoaluin prográmma plánemis.
- Arvasa deiven juo Ijahis ijas ja jerren sis buori áiggis ahte bessetgo čuojahit. Ledjen gullan Ylvas ja válden oktavuođa Keräsii ja jerren ahte leago sis doarvái materiála ovtta konseartta várás. Lei somá go olbmot manne dánsut čuojahanlávddi nala Ylva-konseartta áigge, dajai Korpimäki.
Pieski oainnu mielde gávpotsápmelašvuohta ja -identitehta let nannosit dál go goassege. Pieski mielas dát vuhttui sámi álbmotbeaivve áigge sihke mánáidriemuin ja eahketdoaluin.
- Sáhtán dadjat, ahte doaluid áigge ledjen earenomáš čeavlái, ahte lean dán searvvi ságadoalli. Sávan ahte boahtteáiggis mii sáhttit bidjat resurssaid nuortalaš- ja anárašgiela giellabeassedoaimmaide, muhto maid luonddus vánddardeapmái ja sámi árbevirolaš borramušaid bargamii dego biergguid suovastuhttimii ja guliid sáltemii. Nuuksio álbmotmeahcci leage leamašan dan dáfus midjiide buorre. Sápmelažžii lea dat luondu goitge nu dehálaš, vaikko orošiige gávpotguovllus, oaivvilda Pieski.
Boahtte jagi sámiin lea 100 jagi ávvujahki Troandima jagi 1917 čoakkáma gudnin. Sihke Pieski ja Korpimäki leaba dan mielas ahte oaivegávpotguovllus dáhpáhuvvá dalle, muhto smiehttaba ahte boahtte jagi deaddu lea Troandimis.
- Sávvamis dáppe oaivegávpotguovllus besset olbmot vuolgit maid dohko Troandimii, oaivvilda Korpimäki.